BARO A KURA PAROKO TI ALILEM

Rev. Fr. Michael Lazo Tolentino

Ni Fr. Arwin (outgoing parish) ken Fr. Michael (incoming parish priest) kalpasan ti pannakaammoda ti baro a pagserbianda a parokya.

Inyawag ni Most Rev. Ernesto A. Salgado, D.D.,arzobispo ti Nueva Segovia dagiti kabarbaro a destino a pagserbian dagiti papadi ditoy Ilocos Sur idi Abril 17, 2012 idiay Archbishop’s Residence, Vigan City, Ilocos Sur. Ti napili ken nadutokan nga umay agserbi ditoy parokya ni Nuestra Seńora de Lourdes, Alilem, Ilocos Sur ket ni Rev. Fr. Michael Lazo Tolentino.

Am-ammoentayo ni Fr. Michael sakbay ti yaayna ditoy parokyatayo intono Hunio 1, 2012. Babaen iti daytoy, mairugi iti nasinged a pannakilangentayo iti nakaitalkan ti kararruatayo ditoy Alilem. Isu ti mangaywan kadatayo nga agturong iti panagsingpet nga isu met laeng ti nangawagan ni Apo Dios kadatayo amin.

SIASINO NI FR. MICHAEL?

  Nagan:                      Rev. Fr. Michael Lazo Tolentino

  Pannakaiyanak:        Enero 18, 1978

  Nakaiyanakan:         Santa Maria, Ilocos Sur

  Pagnaedan:             Magsaysay District, Santa, Ilocos Sur

  Nagannak:         Ama    Mr. Armando Tolentino

                            Ina    Mrs. Ofelia Lazo-Tolentino

  Nagbasaan: 

      Elementarya Santa Central School

      Sekondarya    Divine Word College of Vigan

      Kolehiyo    Immaculate Concepcion Orientation                                        Seminary (Vigan City, Ilocos Sur)

                       San Pablo Seminary (Baguio City)

     Theology    Immaculate Concepcion School of

                           Theology (Vigan City, Ilocos Sur)

Petsa a Naordenan a Padi:  Oktubre 2, 2004

Lugar a Nagserserbian:  

     Assistant Parish Priest of Candon City (2005-2006)

     Assistant Parish Priest of Santa Lucia (2006-2007)

     Parish Priest of Galimuyod (2007-May 31, 2012)

Babaen iti pannakisarsarita kenni Fr. Michael, naistoryana a nangrugi kano ti tarigagayna nga agpadi idi nagbalin a sacristan daydi Fr. Gabriel Ramos idiay ilida a Santa, Ilocos Sur. Nakitana kano ngamin kenkuana ti napintas a pannakilangenna kadagiti tattao ken napasnek a panagserbina idi adda idiay parokyada. Nakarit kano ti rikna ni Fr. Michael  ket kinayatna nga aramiden met a kas kadagiti impakita daydi Apo Gabriel. Ditoy a kinayatna ti agpadi.

Kas sumaruno nga umay makipagnaed ditoy ilitayo nga Alilem, kunana a namnamaenna a makilangen kadagiti nasayaat ken nararagsak a tattao. Napadasanna ngaminen ti immay nag-summer exposure ditoy idi agbasbasa pay laeng idiay seminaryo. Nakapasyar metten kadagiti gimgimong ken barangay nangruna idiay Brgy. Daddaay.

WELCOME TO ALILEM APO MICHAEL   (*)

DAMDAMAG PAROKYA ITI BULAN TI ABRIL

Dua a gimong nagfiesta

Agkararag dagiti kameng ti gimong Guilong sakbay iti ranud-pangaldaw

Abril 25, 2012 - Fiesta ni San Marcos Ebanghelista ken fiesta met dagiti dua a gimong ditoy parokyatayo ditoy Alilem, Ilocos Sur a naitalek iti daytoy a Santo - ti Gimong Guilong ken Gimong Camaa.

   Numan pay adu ti pakaringgoran dagiti kamkameng  dagitoy a gimong, saanda a nalipatan ti nagyaman iti Dios gaputa nadanunda a padapada ti aldaw a panagfiesta ti nakaitalkan ken mangibabaet kadakuada amin. Ti ragragsak ken panagyamanda ket inyebkasda iti Nasantoan a Misa nga indauloan ni Fr. Arwin Romulo Rebollido, kura paroko ti Alilem.

   Gaputa ti fiesta dagitoy dua a   gimong ket naaramid kabayatan iti Tiempo ti Panngungar, nagbalin a paset iti ramrambak ti pannakaipaay ti Sakramento ti Pannakalana kadagiti masakit ken nataengan. Naaramat ditoy ti kabarbaro a Lana a nabendisyonan idi Semana Santa kabayatan iti Misa ti Nasantoan a Krisma nga indauloan ni Arzobispo Ernesto Salgado, DD idiay St. Paul Metropolitan Cathedral, Vigan City, Ilocos Sur.

   Nagiburay ni Bro. Peejay Bello, maysa a seminarista a nag-exposure iti makabulan ditoy Alilem, kabayatan dagiti Misa. Impalagipna a nasisita a dagiti amin nga aramiden ti maysa a nabuniagan a maawagan Kristyano ket masapul nga agaon iti pammatina. Segun kenkuana, ti pammati wenno Kinakristyano ket saan laeng a  pammarang ken saan met mabalin nga idulin wenno ibain. Masapul nga agbunga! 

   Kalpasan ti rambak-Misa kadagitoy a gimong, naituloy ti ramrambak babaen iti ranud-pannangan a nagtitinnulongan dagiti gumimong a paaddaen.  (*) 

14 nga agtutubo nakipaset iti EYC 2012

“Nanakem nga Agtutubo Nairamut ken Naipasdek ti Pammati iti Nagungar a Kristo.”

   Daytoy ti tema ti Easter Youth Camp (EYC) 2012 a naangay idi Abril 20-22, 2012 idiay parokya ni San Andres, Suyo, Ilocos Sur a nakipasetan dagiti 14 nga agtutubo a naggapu ditoy ilitayo nga Alilem. Ti dagup dagiti amin a nakipaset a naggapu   kadagiti parparokya ditoy Nueva Segovia ket 247.

   Panggep daytoy a panagtitipon a tubayen dagiti youth ministers ken mangidaulo kadagiti agtutubo kadagiti parparokya ken il-ili tapno agbalinda a nasaysayaat pay a Kristyano ken nanaknakem pay a makipagili.

   Nagyaman ni Fr. Cristeto Cortez, Archdiocesan Youth Coordinator, kadagiti papadi ti Nueva Segovia iti suratna gapu kadagiti tulong ken panangibaonda kadagiti agtutuboda.

   Nagiburay dagiti sumagmamano a nakipaset ti EYC iti naangay a Patangan Parokya maika-39 idi Abril 29, 2012 ket impeksada ti ragsakda gaputa napagasatanda a nakipaset.   Kinunada nga adu dagiti naadalda a mabalinda nga iranud met      kadagiti kapatadada ditoy ilitayo.

   Gapu iti daytoy, napagtitinongan iti nasao a panagtitipon nga addanto maaramid a Parish Easter Youth Camp ditoy lugartayo intono Mayo 18-20, 2012. Maaramid ti panagtaripnong dagiti 14 a nakipaset iti EYC ita nga aldaw, Mayo 6, 2012 tapno maplano ti nasao a gannuat ken tapno maipakaammo kadagiti gimgimong. (*)

Nabunga a Semana Santa narikna

Patangan Parokya 39 a nakatingitingan dagiti pinasamak ti parokya

Numan pay adda dagiti saan a   pulos nangngilin ti naglabas a Semana Santa ditoy ilitayo nga  Alilem, imburay dagiti nakipaset iti Patangan Parokya maika-39 idi Abril 29, 2012 nga adu met dagiti napasnek a nangaramid kadagiti impaannong dagiti nangina nga aldaw.

   Dagiti naggapu kadagiti barbarangay ket impeksada met ti ragsakda gaputa naikkanda manen ti gundaway a makipaset ken makipag-annong kadagiti rambak-liturhiya ti parokya a naaramid ditoy Poblacion. Napagbibingayan ngamin a nagakeman dagiti barbarangay dagiti aldaw ti Semana Santa tapno maigunamgunam ti kinamaymaysa a gimong nga agdaydayaw iti Apo.

   Kuna pay dagiti naggapu kadagiti baryo nga impakatda dagiti baro a wagas a nakitada ditoy simbaan-parokyatayo kadagiti ramrambakda met idiay bukodda a gimong. Maysa kadakuada ket isu iti   panagkararag iti Dalan ti Krus a maaramid kadagiti pagtaengan ken agkakarruba.

   Naibaga pay a Sakramento ti Pangkonfesar a naiyawis idi Semana Santa ket kasapulan pay ti adu a katekismona. Numan pay adu dagiti nagkonfesar, ad-adu latta nga amang dagiti saan a makaitured nga umasideg iti padi tapno ibabawida ti basbasolda. (*)

  

ADAL PAMMATI ITI SAKRAMENTO TI ORDINASYON MAISAKNAP

Naammoan idi Patangan Parokya maika-39 dagiti naaramidan ken nagappuananen dagiti mangibagi  kadagiti nadumaduma a komite nga agtrabaho iti mapasamak a pannakaorden ni Rev. Feliciano Bugtong, Jr. iti kinapadi ita a bulan, Mayo 28, 2012 iti 9:30 ti bigat. Naaramid daytoy idi Abril 29, 2012 iti uneg ti simbaan-parokya ni Nuestra Seńora de Lourdes, Alilem, Ilocos Sur.

  No madagup dagiti naiparang, mabalin a makunan a naurnos ken addan pamalatpatan dagiti pumarokya malaksid iti Food Committee a madama pay laeng nga agbirbirok ti pangalaantayo ti gastoen ken maisagana a  makan.

   Napagtitinongan met dagiti maituding a panagisagana kadagiti luglugar a pakaaramidan ti ramrambak a kas iti simbaan, parish ground ken municipal gymnasium. Dagiti Sabado ita a bulan ti Mayo (Mayo 12, Mayo 19, ken Mayo 26) ket awis kadatayo amin a pumarokya   nangruna dagiti addaan ak-akem nga umay makitinnulong nga agdalus ken   agisimpa. Masarpawanto ti sangoanan ti simbaan tapno adda paglinungan dagiti kakabsat a saan a malaon ti uneg ti simbaan kasta met iti likodan ti Dap-ayan Parokya a paglutoan.

   Kadagiti amin a napagsasaritaan, inpalagip ni Fr. Arwin Romulo Rebollido, kura paroko, a ti kangrunaan a maisagana ket dagiti pumarokya. Kunana a nasisita iti maaramid nga adal-pammati tapno maawatantayo amin ti kaipapanan ti mapasamak nga ordinasyon.

   Dagiti rambak-Misa ti gimong ita a bulan ket isu ti pakaaramidann ti adal. Sumangpetton ni Rev. Bong manipud iti makabulan a panag-retreat da idiay Tarlac tapno kadduanto ni Fr. Arwin a  mangigannuat ti adal.

   Ti maaramid nga adal-pammati maipapan iti Sakramento ti Ordinasyon ket buklen ti panagkararag, panangammo ti doktrina ti Simbaan, panagkampanya para iti panagadu ti bokasyon nga agpadi ken agrelihioso, awis pannakipaset ken pannakipag-annong.

   Impakaammo ni Fr. Arwin a ti Misa ti gimong ita a bulan ti maudin a panagpasyarna kas agdama a kura paroko sakbay nga umalis iti sumaruno a pagserbianna. Naammoan ngaminen idi Abril 17, 2012 babaen ken Most Rev. Ernesto Salgado, arzobispo ti Nueva Segovia dagiti baro a pagserbian dagiti papadi ti Ilocos Sur. (*)