KATEKISMO: TI PANANGIBABAET NI MARIA

Adda surat ni Fr. Nicholas Gruner, ti mangilunglungalong ti Fatima Crusader iti entero a lubong. Ipalpalagip ni Fr. Gruner dagiti mensahe ni Apo Santa Maria ken ni Sister Lucia iti panagparangna idiay Fatima, Portugal idi tawen 1917. Ti kangrunaan a linaon ti suratna ket isu ti panagkamang ken Apo Santa Maria tapno SAAN a dumteng ti nakaro a didigra a patauden ti nakaro a gubat a mangpunas ti adu a daga ti sangalubongan.

Ti kari ni Apo Santa Maria idiay Fatima ket dagiti balikas nga “SIAK LAENG TI MAKATULONG KADAKAYO.”

Adda ngata kinapudnona a ni Apo Santa Maria ket  kabaelanna ti mangtulong kadatayo wenno makaibabaet kadatayo?

NI MARIA A MANGIBABAET KET IPARANG TI BIBLIA

Ni Apo Santa Maria a nagparang idiay Lourdes, France

Makitatayo iti Biblia ti panangibabaet wenno pannulong ni Maria iti napasamak a budaan idiay Cana (Juan 2:1-11). Ditoy a nakita ni Maria a naibusen ti arak nga insagana dagiti nagkasar. Nailanad iti Nasantoan a Surat a  nagkiddaw ni Maria iti tulong ni Hesus. Nayat ni Hesus iti kiddawna ngem kinunana a saan pay a nadanun ti orasna a mangiparangarang ti kinasiasinona a Messias. Ditoy a kinuna ti inana kadagiti agserserbi nga aramidenda amin nga ibilin ni Hesus kadakuada. Napasamak ti milagro - nagbalin a naimas nga arak ti danum!

Nakatulong ni Hesus kadagidi agasawa gapu ti panangibabaet ni Maria. No kasta ti inaramidna idi ditoy daga, kasta met ti agtultuloy nga akemna sadi langit. No dinengngeg ni Hesus nga anakna ti dawatna idi, sigurado met a  denggenna ita ti inana.

Suppiaten dagiti Protestante ti nasao a pannirigan ket ipapilitda a ti budaan idiay Cana ket saan a pammaneknek a ni Maria ket mangibabaet. Kunada a nagkiddaw kano ni Maria iti maysa a banag a saan a kayat nga ipaay ni  Hesus. Kitkitaenda ti paset a kuna a ni Hesus: “Babai, saan a masapul nga ibagam ti aramidek. Saan pay a   dimteng ti orasko.” (Juan 2:4) No saan a kayat a patgan ni Hesus ti dawat ni Maria, apay ngarud nga adda napasamak a milagro? Ni Hesus ti Agturay a Dios; saanna a patgan ti aniaman a dawatentayo a maikanniwas ti pagayatanna. Dagiti balikas nga insawangna ken Maria ket saan a balikas a panangupay iti kiddawna, ket ni Maria a makaam-ammo unay iti anakna, maawatanna dayta.

Ti pammati a dagiti Sasantos ken Sasantas sadi langit ket ibabaetdatayo ket agbasar met iti Biblia. Iparang ti Libro ti Paltiing dagiti duapulo ket uppat a panglakayen a mangidatdaton kadagiti kararagtayo iti Dios a kasla insenso (Paltiing 5:8). Dagiti matmaturogen iti sidong ni Kristo ket pasetda latta iti Bagi ni Kristo a kas kadatayo a sibibiag pay ditoy rabaw ti daga. Ngarud mabalintayo ti agkiddaw kadakuada tapno ikakaasi wenno idawdawatandatayo iti Dios gaputa addadan iti taeng ti Dios.   Nakitadan ti Dios iti rupan-rupan.

Kasta met a mabalintayo ti agkiddaw iti panangikarkararag ti pada a Kristyano kadatayo gaputa kamengtayo ti maymaysa a Bagi ni Kristo.

Ni Apo Santa Maria ket nagungar a Santa ket immuli sadi langit a sibabagi ken sikakararua. Kameng met isuna iti maymaysa a Bagi ni Kristo. Idatonna dagiti kararagtayo iti sangoanan ti Trono ti Grasya.

TI DAWATEN NI APO SANTA MARIA KADATAYO AMIN KET IKARKARARAGANTAYO TI PAGILIAN A RUSSIA.  IDATONTAYO TI RUSSIA ITI DI NATOLAWAN A PUSO NI MARIA.

Kadagiti amin a karkararagtayo nangruna iti panagtitipontayo a kas pamilya ken gimong nga agkararag ti Rosario, iramantayo ti agdawat ken Maria ti panangikakaasina ti Russia ken dagiti aggugubat a    pagpagilian. Makipasettayo koma amin! (*)

(GIBUSNA)

KATEKISMO: MARIA INA TI DIOS?

Ti Baro a Tawen ket masarabo babaen iti panangrambak iti Simbaantayo ti Solemnidad ni Maria nga Ina ti Dios. Daytoy ti kangrunaan a fiesta ni Apo Santa Maria gaputa ti Nadiosan a Kinainana ti pagbasaran dagiti dadduma pay a titulona a kas iti Immaculada Concepcion. Babaen pay iti daytoy, bigbigentayo ni Maria nga immuli’t sadi langit a   sibabagi ken sikakararua.  

Ngem ti titulo nga Maria Ina ti Dios ket pakakigtotan dagiti kakabsat a Fundamentalista!

Kasano nga adda ina ti Dios?

Ti kaririknada ket saan laeng a gapu iti nasao a titulo ni Maria ngem uray pay iti panangawatda ti kinasiasino ni Hesus.

Ammotayo nga awan ti nanang wenno ina ni Apo Dios gapu ket  ngarud ta isu ket agnanayon (awan ti rugi ken pagpatinggaanna).  Ngem gaputa ti Dios ket  nagbalin a tao ket  inyanak ni Birhen Maria (Mateo 1:16), ni Maria ngarud ti ina iti itataona.

Lucas 1:43 - Inawagan ni Elisabet ni Maria nga “Ina ti Apok.” Iti pagsasao nga Hebreo, ti balikas nga “apok” ket ADONAI a kayatna a sawen ket Apo Dios. Daytoy ti naipalaon iti kararag nga Ave Maria a kunatayo, “Santa Maria nga Ina ti Dios…”

Nalaka ngarud a maipalawag daytoy! Ni Hesus ket   Nadiosan ti personana ket daytoy a persona ket Dios. Ni Maria ti ina ni Hesus, ngarud ni Maria ket ina ti Dios. Ni Maria ket saan laeng nga Ina ni Hesus a kas tao (human nature). Dagiti inna ket ina ti kinatao saan nga ina ti kababalin.

No ni Maria ket nanang ni Hesus, ket ni Hesus ket Dios, ngarud ni Maria ket Ina ti Dios. Daytoy ti nabatad a pannakailawlawagna.

Apaman a dayawentayo ni Maria nga Ina ti Dios, saantayo koma nga ipagarup a ni Maria ket natataengan wenno nabakbaket ngem ti Dios. Ni Maria ket Ina ti Dios gaputa sinikogna ti Nadiosan a persona nga isu ni    Hesu-Kristo - ti Dios a nagbalin a lasag kas iparang ti 2 Juan 7 ken Juan 1:14. Ni Maria ket nakipaset iti pannakabukelna a kas tao. Mabalin a kunatayo a ti Dios ket nangala iti lasagna ken Apo Santa Maria.

Adu pay dagiti kontra-Katoliko a mamasirib nga agkuna a saan kano nga kinarga wenno inawit ni Maria ti Dios iti tianna. Ti laeng kano kinataona ti kinargana. Daytoy a palso a panursuroda ket napabaro a pannirigan ti Nestorianism idi maikalima a siglo. Daytoy met ti pannirigan dagiti kakabsattayo a kameng ti Iglesia ni Kristo. Ngarud, saanda a mamati a Dios ni Hesus no di’ ket tao laeng.

Ti pannirigan dagiti mangsuporta ti Nestorianism ket saan a maibasar iti Biblia. Kunada ngamin a ni Maria ket saanna nga  inyanak ti kabuklan a kinasiasino ni  Hesus (Dios ken Tao). Kayatda a pagsinaen ti Nadiosan a kababalin ni Hesus ken iti naintaoan a kababalinna. Nagtipon ti Nadiosan ken naintaoan a kababalinna ngem nalukay kano ti panagdekketda. Daytoy ket palso a doktrina!

Awan dudua nga ad-adda a daydayawen dagiti kameng ti Iglesia ni Kristo ni Felix Manalo ngem ni Apo Hesus. Saanda met a nagrambak iti Paskua iti Itatao ti Dios a kas kadatayo a Kristyano.

Dagiti kakabsat a kameng ti Iglesia ni Kristo ket saan a mabalin a maibilang a Kristyano! (*)

(GIBUSNA)

DAMDAMAG ITI BULAN TI DISYMEBRE

Ni Apo Salgado kabayatan iti panangbunotna ti nangabak iti kotse a ticket.

Panangdalus kananakem awis rambak-anibersaryo

Nagtitipon dagiti obispo ti amianan a Luzon, dagiti papadi ken laygo idiay St. Paul Metropolitan Cathedral, Vigan City, Ilocos Sur idi Disyembre 23, 2011 tapno makipagrambakda ken Arzobispo Ernesto A. Salgado, D.D. iti maika-50 nga anibersaryo ti pannakaordenna a padi.

   Nakalalagip a pasamak daytoy iti arkidiosesistayo gaputa ti agdama nga ama ti pammati ket rambakanna ti limapulo a tawen ti grasya kabayatan pay laeng iti panagtakem nga arzobispotayo.

   Kabayatan ti rambak-Misa, ni Abbot Santos Rabang ti nangted iti pagpanpanunutan kabayatan iti panangkablaawna ti ag-anibersaryo nga arzobispo. Pinauloanna ti homiliana iti Purification. Kayatna nga iturong ti panpanunot dagiti nakipaset iti rumbeng nga aramiden kalpasan ti adu a naglasatan ti simbaan-lokaltayo ditoy Ilocos Sur babaen kadagiti innem a nagsisinnublat nga arzobispo.

   Inyunay-unay ni Abbot Rabang a ti kasapulan ti Simbaantayo ita ket isu iti panangdalus iti kananakemtayo amin ket agbalintayo a pudno a saksi ni Hesus ditoy lubong.

   Kalpasan ti rambak-Misa, naaramid ti ranud-pangaldaw iti Archbishop’s Residence. Ditoy a naaramid ti raffle draw a ti kangrunaan a premyo ket kabarbaro a kotse. Ni Apo Salgado a mismo ti nangbunot ti nagasat a nangabak ket nabunot ti ticket number 44068 a ginatang ni Victoria D. Cambe manipud Lungog, Narvacan, Ilocos Sur.

   Ti napastrek iti nasao a paripa ket pangnayon iti Hospitalization Fund dagiti papadi. Ditoy ti pangalaan iti gastoen iti pannakaagas dagiti  agsakit a papadi ditoy Nueva Segovia (Ilocos Sur. (*)

Kanta ti Paskua!

Rambak-Paskua naaramid iti PP 35

Disyembre 18, 2011 - Naaramid ti Patangan Parokya maika-35 iti sirok ti konbento-parokya ni Nuestra Seńora de Lourdes, Alilem, Ilocos Sur. Daytoy ket nagserbi a Rambak-Paskua dagiti nakipaset a mangibagi kadagiti gimong.

   Adda nagkanta, nagdaniw,  nagsala ken nagistorya kabayatan iti ababa a programa. Adda met bassit a raffle draw a nakaawatan dagiti amin a  nakipaset iti simple a sagut. Saan a napapateg a sagut dagitoy ngem kas senyal laeng iti panagyaman ti parokya kadagiti naanus a katulongan iti pannakaipakat ti  programa-pastoral. (*)

Konfesar naiyawis iti Adviento

Dagiti agbasbasa idiay Amilongan Elementary School kabayatan iti panangurayda ti batangda nga agkonfesar.

Nanipud pay  itatapog iti baro a  kalendaryo ti Simbaan a mairugi iti Tiempo ti Adviento, naaramid ti pannakaawis dagiti pumarokya ti Nuestra Seńora de Lourdes, Alilem, Ilocos Sur nga awatenda ti Sakramento ti Panagbabawi wenno Konfesar.

   Dagiti Misa-Pagadalan iti bulan ti Disyembre ket naited a gundaway dagiti agbasbasa ken mangisursuro nga umasideg ken Apo padi tapno ibagada dagiti basbasolda. Ditoy a naduktalan a kaadduan kadagiti ubbing nga agbasbasa (Grade III agpangato agingga iti sekondarya) ket kapaminduada pay laeng ti ag-Konfesar nanipud panag-Primera Komunionda.

   Naited met a tiempo ti panag-Konfesar ti naaramid a Sanay-Akem iti bulan ti Disyembre. Nagkonfesar dagiti Ministro ti    Komunion idiay gimong Baudan, Brgy. Apaya idi Disyembre 4 ken kadagiti met Lectors ken Commentators idiay Brgy. Amilongan idi Disyembre 11.

   Sakbay met a naaramid dagiti Misa Barangay ken Rambak-Paskua ti Barangay, naiyawis met ti panag-Konfesar dagiti kameng ti gimong.

   Ti nasao a panag-Konfesar ti narikna a kapintasan nga aramiden dagiti pumarokya sakbay nga inlagipda ti  Itatao ti Dios babaen ken Hesus. (*)

DAMDAMAG ITI BULAN TI DISYEMBRE

Bulan ti Sagut Apit nairubbuat

Disyembre 30, 2011 - Nagsangpet dagiti sinako nga irik iti sangoanan ti simbaan parokya ni Nuestra Seńora de Lourdes,  Alilem, Ilocos Sur. Senyal daytoy a mangrugi manen ti Sagut-Apit ditoy ilitayo.

   Ti Sagut-Apit ditoy Brgy. Poblacion ket naaramid babaen iti Nasantoan a Misa. Inpalagip ni Fr. Arwin Romulo Rebollido, kura paroko, a saan a dagiti daton nga apit laeng ti nangnangruna no di’ ket ti pamilya a nagdaton. Kastoy met ti manamnama a mapasamak kadagiti gim-gimong ken barangay ita a bulan ti Enero. Nasisita a  makimisa met dagiti agdaton.

   Nagbalinen a kannawidan ti parokya ti nasao a panagidaton   kadagiti bunga ti nagbannogan iti tinawen. Daytoy tay maawagan idi un-unana a Defuncturom wenno umras.

   Ti Sagut-Apit ditoy parokya ket ti panangited dagiti pumarokya ti paset iti naapitda, wenno aniaman a nagbannoganda, iti Simbaan kas pagyaman iti Dios ti kinamanagparaborna ken pangikakaasi kadagiti pimmusayen a nagtawtawidan    kadagiti dagdaga a pagtaltalonan. Kaadduan ngamin a kameng daytoy a parokya ket mannalon.

   Ti Liturhiya a maaramat ket Misa a Pagyaman ket maidawdawatan met dagiti minminatay. Mawarisan dagiti makimisa ken kasta met dagiti intogotda a daton.

   Kanayon nga ipalagip ni Fr. Rebollido a ti panagyaman iti Dios ket  panagdawat iti ad-adu pay a bendisyon.

   Dagiti ubbing kadagiti pagadalan ket masursuroanda met a mangamiris ti kaipapanan ti panagyaman. Maiyawis kadagiti Misa-Pagadalan ita a bulan nga agidaton met dagiti ubbing kadagiti sagutda. (*)

Ayat ni Apo Dios narikna iti aldaw ti Paskua

Disyembre 25, 2011 - Kaaldawan ti Paskua ti Itatao ti Dios ken kaaldawan met ti pannakaaramid ti Ragup-Kasar ken Ragup-Buniag ditoy parokya ni Nuestra Seńora de Lourdes, Alilem, Ilocos Sur.

   Adda 17 a pares ti agasawa nga immawat ti Sakramento iti Kasar kabayatan ti Rambak-Misa iti kaaldawan ti Paskua. Kaadduan kadakuada ket nabayagdan a nagdendenna ket adda pay  annakdan. Adda pay dagiti masikog ken nataengan.

   Kabayatan ti Misa, impalagip ni Fr. Arwin Romulo Rebollido a ti ladawan ti pannakaipasngay ni  Hesus a Mangisalakan ket ladawan iti kinasimple. Naiyanak iti  kulluong. Ipalagipna daytoy a ti kinasimple ti tao nangruna ti  kinapakumbabana ti ad-adda a pakaay-ayoan ni Apo Dios.

   Kalpasan ti Misa, naarambakan ti Sakramento ti Buniag kadagiti 27 nga ubbing a kaadduan met kadakuada ket annak met laeng dagiti nagkasar iti dayta nga aldaw.

   Naisaruno ti Rambak Gimong a nangpasangbay kadagiti kakaskasar. Adda naisagana nga ababa ken simple a programa a naaramid iti salunan iti sango ti konbento-parokya nga isu ti nangisagana kadagiti makan. Pancit, tinapay ken soft drinks ti adda a nagsasangoan dagiti nagkakasar ken dagiti nanganak kadakuada. Napirmaan met ditoy dagiti Marriage Contract. (*)

TULONG KADAGITI BIKTIMA TI KALAMIDAD NAIDANUN

Dagiti relief goods kabayatan ti pannakaikargada iti logan ti parokya.

Dagiti agtutubo ti Alilem a nangitulod kadagiti relief goods sadiay opisina ti Caritas Nueva Segovia.

“Let us pray for the dead and let us help the living who are suffering very much.”

  Dagitoy dagiti balikas a mismo ni Arzobispo Ernesto A. Salgado, D.D., arzobispo ti Nueva Segovia iti suratna kadagiti amin a papadi ditoy Ilocos Sur idi Disyembre 22, 2011. Mainaig daytoy iti pananglagip kadagiti kakabsattayo idiay Mindanao a nadidigra iti Bagyo Sendong idi Disyembre 17, 2011. Dawatenna ti panangikararag kadagiti adu a natnatay ken tulongan met dagiti sibibiag a nakaro ti panagsagabada.

   Ni arzobispo ket kiniddawna a maaramid ti second collections kadagiti amin a Misa ti kaaldawan ti Paskua (Disyembre 25).

   Sakbay pay a dimmanun ti surat ni Apo Erning, ti parokya ni Nuestra Seńora de Lourdes, Alilem, Ilocos Sur ket nangaramiden ti gannuat a pangtulong kadagiti kakabsat idiay Mindanao. Kadagiti siam a Misas de Gallo, naawis dagiti pumarokya nga agidatonda kadagiti luplupot, makan, alikamen ken dadduma pay. Agpaay koma daytoy kadagiti marigrigat ditoy parokya ngem gapu iti napasamak a didigra iti abagatan a paset ti pagilian, dagitoy ket naipan idiay opisina ti Caritas Nueva Segovia, Vigan City, Ilocos Sur.

   Dagiti indaton dagiti pumarokya ti Alilem ket naidanun iti opisina ti Caritas idi Disyembre 23, 2011, kaaldawan ti maika-50 nga anibersaryo ti kinapadi ni Apo Arzobispo Salgado. Kinuna ni Sr. Lilian Carranza, OSB, ti mangimatmaton ti Caritas, a ti Alilem pay laeng ti kaunaan a nakaaramid ti nasayaat a gannuat uray sakbay  pay nga inbaga ti arzobispo.

   Adda pay dagiti naud-udi a daton a simmangpet ditoy konbento-parokya. Mabalin a dagitoyton ti maipaay met kadagiti kakabsat a napanglaw ditoy Alilem. Ngem no adda pay dagiti kayattayo nga itulong kadagiti kakabsat idiay Mindanao: bado, makan wenno kuarta man, mabalintayo ti makiuman iti opisina ti parokya.

   Iti surat ni Apo Salgado, maipalagip a pagrebbengantayo amin a Kristyano ti tumulong kadagiti agkasapulan ket saan a mabalin nga iyaleng-aleng. (*)

  

KATEKISMO

 ADDA ANNAK A SABALI NI MARIA?

Adu ti agkuna nga adda pay sabali nga annak ni Apo Santa Maria malaksid ken Hesus. Dagiti Protestante ken kontra-Katoliko suppiatenda iti isuro ti Simbaan Katoliko a ni Maria ket agnanayon a birhen (ever virgin). Agpidutda ngamin kadagiti paset ti Biblia ket ibagada a ni Maria ket nagsikog pay iti sabali.

Ti masansan a kitkitaenda ket ti Mateo 13:55-56 (wenno ti Marcos 6:3). “Saan aya nga isu ti anak ti karpintero? Saan aya a ni Maria ti inana ket da Santiago, Jose, Simon ken Judas dagiti kakabsatna? Saan aya nga agnanaed ditoy dagiti kakabsatna a babbai?”

No basaem daytoy nga awan ti ammom iti pagsasao a Griego (Greek), ti daan a pagsasao a nakaipatarusan ti Biblia, mapataud iti biddut a pannakaawat. Ti balikas a KAKABSAT ket ADELPHOI iti Griego ket daytoy mabalin a KABSAT A LALAKI (adelphos) wenno KABSAT A BABAI (adelpha). Nalatak met daytoy iti Mateo 12:46-50, Marcos 3:31 ken Lucas 8:19.

Ammoentayo ti kinapudno!

Umuna, ti Biblia ket saanna nga ibaga a dagiti kunana a “kakabsat ni Hesus” ket annak ni Maria.

Maikadua, Aramaic ti pagsasao iti lugar a dimmakkelan ni Hesus. Ti Biblia idi a naisurat iti Griego usarenna ti balikas nga adelphoi a pangawag ti kabsat a lalaki (adelphos) ken kabsat a babai (adelpha). Uray kadagiti kaar-arngi ti Aramaic a pagsasao, awan ti pagdumaan iti panangawag iti kabsat a kadaraan ken iti kasinsin. Maawagan pay nga agkabsat (adelphos) da Jesus ken Juan Bautista numan pay iti kinapudnona ket agkasinsinda (agkasinsin ngamin da Maria ken Elizabeth nga innada).

Kinaagpaysona, maiparang iti Biblia nga adda sangapulo a mabalin a nakausaran ti balikas a KABSAT wenno   ADELPHOS segun iti Vine’ Expository Dictionary of the   Biblical Words, Thomas Nelson Publisher:

1. Lallaki nga annak ti agpada a nagannak (Mateo 1:2)

2. Lallaki a kaputotan ti agpada a nagannak  (Aramid 7:23)

3. Lallaki nga annak a maymaysa ti inada  (Galatia 1:19)

4. Tattao nga maymaysa ti ilida (Aramid 3:17)

5. Uray siasino a lalaki a kaarruba (Lucas 10:29)

6. Tattao a nagkaykaysa gapu iti maymaysa a paggugustoda (Mateo 5:47)

7. Tattao a nagkaykaysa gapu iti maymaysa a nakaawaganda wenno trabahoda (Paltiing 22:9)

8. Sangkataoan (Mateo 25:40)

9. Dagiti adalan (Mateo 23:8)

10. Dagiti mamati (Mateo 23:8)

Tapno mapaneknekan, kitaen dagiti sumaganad:

Ni Lot ket nakuna a kabsat a lalaki ni Abraham numan pay kinapudnona ket kaanakanna koma (Genesis 14:14 ken Genesis 11:26-28).

Ni Jacob iti Genesis 29:15 ket naawagan a kabsat ni Laban nga ulitegna wenno tiyona (uncle).

Iti 1 Cronicas 23:21-22, maiparang a ni Kish ken Eleazar ket annak ni Mahli. Adda putot ni Kish a lallaki ngem ni Eleazar ket awan gaputa babbai laeng ti putotna. Dagitoy a babbai ket inasawada dagiti “kakabsatda.” Dagiti nakuna a kakabsatda ket dagiti putot ni Kish a lallaki a kasinsinda.

Ti balikas nga “inauna nga anak a lalaki” iti Exudo 13:2, 3 ket makaallilaw. No ngamin alaen daytoy a pagbasaran iti maysa nga awag ken Hesus nga “inauna nga anak a lalaki ni Maria,” kayatna a sawen ket no adda inauna, adda met inaudi wenno sumaruno nga  annak. Ngem iti kinapudnona, ti balikas nga “inauna” kadagiti Judio ket balikas a pangawag iti anak nga immuna a nanglukat ti tiyan iti maysa a babai. Awan ti pakainaganna iti ina nga aganakto ti adu nga annak.

Ni Profeta Ezekiel iti Ezekiel 44:2, inpadtona nga “awan ti makastrek iti ruangan a sumrekan ti Apo.” Kadagiti biblical scholars, daytoy ket padto a ni Maria ket  agnanayonto a birhen. Isuro ti Simbaan a ni Maria ket birhen sakbay, kabayatan ken kalpasan ti pannakaiyanak ni Hesus.

Adda pay nasken a kitaentayo. Iti Lucas 1:31, 34, kuna ti anghel a ni Maria ket “agsikogto.” Mapasamakto daytoy iti masakbayan. Simmungbat ni Maria iti “Kasano a mapasamak daytoy idinto ta maysaak a birhen.” 

 

Ti sungbat ni Maria ket panangipakitana iti karina nga agtalinaed a birhen ket awan ti panggepna a makinaig iti lalaki. No saan nga inkari ni Maria dayta, ania koma ti serserbina iti insawangna a saludsod? Kas maysa a balasang idin, ammona ngata metten no kasano nga agsikog ti maysa a babai.

Awan ti naibaga nga adda pay kakabsat ni Hesus idi napan ti Sagrada Pamilya idiay templo ti Jerusalem a no sadino ket napukaw ngem nabirokanda met laeng ni Hesus. Masapul nga amin a kameng koma ti pamilya ket mapanda idiay templo (Lucas 2:41-51).

Iti sakaanan ti krus, intalek ni Hesus ni nanang kenni Juan a maysa kadagiti adalanna ken gayyemna. Saansa a nasayaat a panunoten nga italekmo ti bukodmo nga ina iti gayyemmo laeng idinto ta adda met kakabsatmo. Kayatna a sawen, awan ti kabsat ni Hesus a makuna a kabagisna.

Ti dakkel a biddut dagiti kontra-Katoliko ket ti panangipapilitda nga usaren ti balikas a “kabsat” a kas “kabagis.” Dua a wagas ti panangipalawagda iti Mateo 1:25 iti kunana a “saanna a sinagid ni Maria agingga nga impasngayna ti maysa a lalaki…” Ti balikas nga “agingga” ket HEOS iti Griego ken iti Ingles ket TILL wenno UNTIL. Masapul kano a literal ti panangawat daytoy. No kuna ti Biblia a saanda a nagkaidda agingga a naiyanak ni Hesus, kayatna a sawen, kunada, a nagkaiddada kalpasan ti panaganak ni Maria. Kasta met a ni Hesus ket naawagan nga “inauna” (first-born). Kayatna a sawen kano nga adda met maikadua a naiyanak wenno maikatlo.

Nagrabaw ti panniriganda! Usarenda ti maysa a balikas iti moderno a pannakaawat. Dida met awaten ti usto ken umno a kaipapanan dagiti balikas idi naisurat ti Biblia. Kas koma iti balikas nga “agingga.” Iti Biblia, kayatna a sawen nga adda dagiti aramid a saan napasamak agingga iti maysa a kanito. Saanna nga ibaga a dayta nga aramid ket napasamak kalpasan dayta a kanito. Kastoy ngamin ti moderno a pannirigan no kunam nga “agingga” (until).

Kas pangarigan, ni Michal nga anak ni Saul ket saan a naganak agingga iti ipapatayna (2 Samuel 6:23). No usarentayo ti panagpanpanunot dagiti kontra-Katoliko, mabalintayo a kunaen a naganak pay ni Michal kalpasan iti ipapatayna. Nakakatkatawa!

Iti pay Deuteronomio 34:6 kunana a ni Yahweh ti nangitanem ken Moises. “Ngem, agingga ita, awan ti makaammo iti mismo a lugar a nakaitanemanna.”  Awan idi ti  makaammo kadayta a kanito. Ngem uray met agingga ita ket awan makaammo.

Masapul a takderantayo nga awan ti ibaga ti Ebangheliyo ken dagiti immuna a Kristyano a ni Maria ket naganak pay iti sabali malaksid ken Hesus.

Datayo a mamati, ammoentayo, babaen ti pammaneknek ti Nasantoan a Surat ken ti Tradisyon ti Simbaan a ni Hesus ket bugbugtong nga anak ni Maria ket ni Maria ket nagtalinaed a birhen.

NARAGSAK A PASKUA KEN NAGASAT

A BARO A TAWENYO AMIN!

(GIBUSNA) (*)

DAMDAMAG ITI BULAN TI NOBYEMBRE II

Primera Komunion ti elementarya naiwakas

Maysa a pamilya sadiay Marmarsang, Batbato kabayatan iti panaglualoda iti kararag a naipaannong kadakuada kalpasan iti saggaysa a panagkonfesarda sakbay ti primera-komunion. Ti wagas iti panagkonfesar ket umuna nga umay ti ama, kalpasanna ti ina, ket sumaruno dagiti annak.

Tallo a pagadalan-elementarya ti nakaangayan ti Primera Komunion ditoy Alilem, Ilocos Sur iti bulan ti Nobyembre 2011. Dagitoy ket ti Daddaay Elementary School, Batbato Elementary School ken Apaya Elementary School. Dagitoy dagiti eskwelaan a naggapuan dagiti  maudi a grupo dagiti ubbing nga immawat iti Sakramento ti Komunion kas paset iti agtultuloy a pannakatignay dagiti ubbing iti   parokya tapno makipaset ken    makipag-annongda iti bukodda a gimong.

   Maipalagip a nasapa a naigannuat ti nasao a programa gapu iti nairugi a Misa-pagadalan ita a tawen. Nangrugi daytoy idi bulan ti Hulio 2011.

   Kas nagbalinen a kannawidan, inkapilitan ti pannakipaset dagiti nagannak manipud panagsagana, kabayatan ken kalpasan ti panag-Primera Komunion dagiti annak. Kadagiti nasao a pagadalan, adda sumagmamano nga ubbing a saan a nairaman gapu ti panagkitakit dagiti nagannak a makipaset numan pay nabalinanda koma ti immay. No pudno nga adayo wenno awanen dagiti nagannak ket saan a nalaka a makadar-ayda, napalubusan dagiti annakda a nag-Primera Komunion.

   Kas kanayon nga ipagpaganetget ni Fr. Arwin Romulo Rebollido, kura paroko, dagiti ubbing ket addada pay laeng iti tawen nga agad-adal ken mangtaktakkuat iti kinapudno.          Ad-adda a sumagepsep ti aniaman nga adal no makitada daytoy kadagiti natataengan nangruna dagiti nagannak. Ad-adda nga ipategto dagiti ubbing ti Nasantoan a Misa no  makitada nga maki-Misa met dagiti nagannak kadakuada.

   Ti Kiat Elementary School ket adda laeng maymaysa nga ubing a mabalin nga ag-Primera Komunion. Mabalin nga maaramidto iti Misa-barangay ita a bulan.

   Saan pay a naisimpa ti Primera-Komunion kadagiti sumagmamano nga estudyante iti Alilem, National High School. (*)

Kristo tarigagayan a pagarien dagiti umili

Ti Santisimo Sakramento kabayatan iti pannakaiprosisyonna iti likmut ti Poblacion

Nobyembre 20, 2011 - Nagtitipon dagiti pumarokya ditoy Nuestra Seńora de Lourdes, Alilem, Ilocos Sur tapno ipaduyakyak ken bigbigenda ni Apo Hesus nga Ari ti sangalubongan.

   Napadaeg ti ramrambak gapu iti panagtitipon dagiti pumarokya a naggapu kadagiti amin a bar-barangay ken gim-gimong. Ti rambak-Misa ket nagbibingayan a nagakeman dagiti delegados ti barangay. Ti paset iti Misa a pannakaiprosisyon ti Santisimo Sakramento ket nasolemne ken nainkararagan a naigannuat numan pay adda dagiti naimatangan a sumagmamano nga agsasarita ken aggaangaw.

   Kabayatan ti prosisyon iti likmut ti Poblacion, adda uppat a suli a   nakaisaadan ti Santisimo Sakramento a no sadino ket nagkararag a napasnek dagiti pumarokya. Nairaman ditoy ti  kararag a pagdawat iti pannakaurnos dagiti pamilya kasta met iti kararag tapno umapay ti kappia ti sangalubongan a mairugi iti bukod a bagi, pamilya ken gimong.

   Iti Patangan Parokya 34 a naangay idiay Anaao Proper idi   Nobyembre 27, 2011, impeksa ti sumagmamano a nakipaset iti   ragsakda gaputa mariknada ti anag ti Solemnidad ni Kristo Ari babaen kadagiti naigannuat nga aktibidades iti bukodda a parokya. Kunada nga uray saandan a makipaset iti Archdiocesan       Celebration iti sabali nga ili a kas idiay Santo Domingo, Ilocos Sur a nakaangayanna ita a tawen.

   Maipalagip a ti ilitayo nga Alilem ket nagbalin nga host parish ti Christ the King Archdiocesan Celebration idi 1998. (*)

DAMDAMAG ITI BULAN TI NOBYEMBRE

Kasangay, anibersaryo ti arzobispo tulong papadi

Patangan Parokya 34 idiay Anaao Proper

 Naibunong dagiti raffle tickets kadagiti mangibagi ti gim-gimong idi Nobyembre 27, 2011 kabayatan ti Patangan Parokya 34 idiay Anaao Proper. Babaen kadagitoy a nakipaset iti taripnong, pagbibingayan dagiti pumarokya dagitoy a tickets kas panangipakita iti sangkaparokyaan a pannakipaset iti gannuat ti arkidiosesis ti Nueva Segovia.

   Dagiti nasao a raffle tickets ket mabalin a mangabak iti kabarbaro a kotse nga Spark Chevrolet. Mabolanto daytoy intono Disyembre 23, 2011, ti aldaw a panangrambak ni Arzobispo Ernesto A. Salgado ti maika-75 a kasangayna, maika-50 a tawen ti kina-padina, ken maika-25 a tawen ti kina-obispona. Maaramidto daytoy idiay Archbishop’s Residence, Vigan City, Ilocos Sur.

   Adda met agur-uray a 20 consolation prizes tapno adu dagiti makaawat ti   gunguna.

   Ti nasao a paripa ket napauloan iti PARI KO MAHAL KO II. Maipalagip nga adda manen kastoy a pasamak idi napan a tawen ket kabarbaro a kotse met laeng ti kangrunaan a  premyo a nangabakan ti maysa a doktura manipud Magsingal, Ilocos Sur.

   Kas idi damo, ti mapastrek a pondo ket agpaay iti hospitalization fund dagiti papadi ti Nueva Segovia. Daytoy ket dakkel a tulong kadagiti retirado a papadi ken uray pay kadagiti aktibo iti serbisyo apaman nga agsakitda.

   Iti ababa a balikas, inbinsa-binsa met ni Apo Salgado ti kaipapanan ti hospitalization fund a para kadagiti papadi idi immay ditoy ilitayo nga Alilem idi Oktubre 23, 2011 kabayatan ti Bisita Pastoralna. Impakpakaasina ti pannakitinnulongtayo amin.

   Masapul a maammoantayo nga apaman a naordenan dagiti papadi, pinanawandan ti bukodda a pamilya ken pagtaengan tapno serbianda dagiti tattao a maitalek kadakuada. Amin a pigsa ken tiempoda ket ipaayda amin iti Simbaan.

   Kas tattao a mamati a maawagan Simbaan, pagrebbengantayo amin a suportaan ken taripatoen met dagiti papaditayo nga agserserbi met laeng kadatayo. Awan ti sabali a pangnamnamaanda a tumulong kadakuada no saan a kadagiti tattao met laeng.

   Inpalagip met ni Fr. Arwin Romulo Rebollido a saan koma nga ti abaken a premyo ti panunuten no gumatang ti ticket. Ipangruna ketdi ti kananakem ken tarigagay a tumulong, makipaset ken makipag-annong iti Simbaan.

   Naibunong aminen dagiti raffle tickets a naited iti parokyatayo nga agpateg laeng iti P20.00 iti maysa. Nalaka ti gatadna tapno amintayo ket mabalin a makipaset.

   No adda man mayat pay a mangala ti tickets, mabalintayo ti makiuman iti konbento ti parokya tapno agkiddawtayo idiay Vigan City.  (*)

Diosesis ti La Union naulila

Nobyembre 13, 2011 - Pimmusay ni Most Rev. Artemio Rillera, SVD, D.D., obispo iti Diosesis ti La Union gapu iti severe asthma attack kalpasan ti panag-Misana idiay Seminary of the Sacred Heart, San Fernando City, La Union.

   Ni Apo Rillera ket naiyanak idiay  ili ti Naguilian, La Union. Naordenan a padi idi Nobyembre 28, 1970 ken kas obispo idi Agosto 28, 1993. Kas obispo, nagserbi iti 17 a tawen idiay Diosesis ti Bangued, Abra. Idi Abril 14, 2005, naisaad nga obispo ti La Union.

   Adda Misa nga indauloan ni Most Rev. David William Antonio, D.D., ti kabarbaro nga Auxiliary Bishop ti Nueva Segovia, idiay St. William the Hermit Cathedral, San Fernando City, La Union idi Nobyembre 21, 2011. Ditoy a naimasayag ti bangkay ni Apo Rillera iti dua nga aldaw. Inistorya ni Bishop Antonio iti Misa a nakipasetan dagiti papadi ti Bikariato ni Santa Teresita, dagiti adu a kanito a nangipakitaan ti natay nga obispo ti kinapakumbaba ken kinasimplena.

   Iti kinaulimek ken kinaalumanay ti nasao nga obispo, nagbalin daytoy a nalatak gapu iti kinaturedna a nangsuppiat kadagiti istruktura ti basol iti probinsya nangruna ti panagraira ti droga ken adu a kaso ti pammapatay. Nangidaulo ti sumagmamano nga street demonstrations. Gapu iti daytoy, nakaawat pay iti maysa a pammadayaw manipud iti Saranay Award.

   Ti Diosesis ti La Union ket suffragan diocese ti Nueva Segovia. (*)