Tahanang Walang Hagdanan immawat ti taga-Alilem

Personal a napan sinarungkaran ni Sr. Theogenia         Magallanes, OSB ken dagiti kakadduana, ti ubing nga   handicapped a ni Alejandro Olag manipud Brgy. Amilongan, Alilem, Ilocos Sur idi Hulio 16, 2011. Ditoy nga inawisda ti ubing a mapan makipagnaed idiay Tahanang Walang Hagdanan idiay Vigan City, Ilocos Sur.

   Ti nasao a lugar ket maysa nga  institusyon a mangtaming kadagiti kakabsat a nga adda sagubanitda iti pannagna. Ni Alejandro ket agus-usar iti saklay no magna gaputa babassit dagiti gurongna

   Ti nasao nga ubing ket anak ti nabalo a ni Mr. Rico Olag. Inrekomenda ni Mr. Placido Daweng ti ubing a mapan idiay Vigan City gapu ti asina iti sasaadenna. Kas maysa a maestro a nangisursuro ken Alejandro iti elementarya, nakitana ti pudno a kasapulanna. (*)

228 nakipaset iti YE 9

“Biag - Sagut ti Dios, Ipateg ken Ilalaen.”

   Daytoy ti tema ti naangay a Youth Exchange ditoy bikariato ni Santa Teresita idi Hulio 16-17, 2011 idiay parokya ni San Agustin, Tagudin, Ilocos Sur. Agdagup iti 228 nga agtutubo ti nakipaset.

   Ti kangrunaan nga adal a naipaay kadagiti agtutubo ket maipanggep iti kontrobersyal ita a Reproductive Health Bill (RH Bill) a mabalin a madagup kas linteg a mangilungalong kadagiti artificial contraceptives wenno wagas a manglapped ti sikog. Tinakkuat dagiti nakipaset dagiti epektona kadagiti nadumaduma a benneg ti biag.

   Kas namnama ti masakbayan, impeksa dagiti agtutubo ti panggepda a mangsuppiat ti RH Bill ket ikagumaanda a takderan daytoy. Tarigagayda nga iburay ti adal a natakkuatanda kadagiti bukodda a parokya.

   Adda 17 nga agtutubo manipud ditoy parokya ni Nuestra Seńora de Lourdes, Alilem, Ilocos Sur ti nakipaset. Dagiti nangibagi kadagiti  annaktayo ket tarigagayda nga angayen ti Parish Youth Exchange   intono Agosto 27-28, 2011 idiay Brgy. Dalawa, Alilem, Ilocos Sur (*)

KATEKISMO: SAKRAMENTO TI BUNIAG

ANIA TI SAKRAMENTO?

Ti Sakramento ket makaisalakan nga aramid a nagtaud iti aramid ni Hesus ken maitultuloy iti,      babaen ken agpaay iti Simbaan. No marambakan ti  Sakramento a napnoan pammati, agbalintayo a    maiyasping ken Kristo. Ti panggep dagiti Sakramento ket mangpasanto, mangbukel ti Bagi ni Kristo nga isu ti Simbaan, ken pagdaydayaw iti Dios.

Pito ti bilang dagiti Sakramento: Buniag, Konfirma, Misa, Konfesar, Lana ti Masakit, Ordinasyon ken     Kasar.

ANIA TI MAKUNKUNA SACRAMENTS OF  INITIATION?

Dagiti Sakramento ti Buniag, Konfirma ken Misa ti maawagan a Sacraments of Initiation. Isuda ti     mamagbalin iti maysa a tao a napekpeklan a Kristyano. Ti maysa a mamati ket maiyanak manen no Mabuniagan, mapapigsa babaen iti Konfirma ken awatenna ti taraon nga agpaay iti biag nga agnanayon babaen iti Misa.

ANIA TI BUNIAG?

Ti Buniag ket Sakramento a mangted naesperituan a  pannakaiyanak manen ken isu ti pondasyon ti sibubukel a Nakristyanoan a panagbiag. Babaen iti simbolo a pannakaugas iti danum ken dagiti balikas a sumaganad: “Siak buniaganka iti nagan ti Ama, ken ti Anak ken ti Espiritu Santo.” ti mabuniagan ket maugasan iti amin a basol (basol a tawid ken personal a basol). Maikaysa pay ti mabuniagan ken Kristo.

APAY A NASISITA TI BUNIAG?

Ni Hesus a mismo ti nagkuna a ti buniag ket nasisita tapno maisalakantayo. Iti Marcos 16:16, kinuna ni Hesus: “Ti mamati ken mabuniagan, maisalakanto. Ngem ti di mamati, madusanto.” Iti met Mateo 28:19, kinuna pay ni Hesus: “Inkay ngarud kadagiti amin a tattao iti amin a lugar ket pagbalinenyo ida nga adalak: buniaganyo ida iti nagan ti Ama, ken ti Anak ken ti Espiritu Santo.”

SIASINO TI MABALIN A

MABUNIAGAN?

Ti ubing a saan pay a nabuniagan ket mabalin a mabuniagan no la ketdi adda pammatalged a dagiti     nagannak ket padakkelenda ti ubing iti Kristyano a pammati. Ngem ti nataengan a mayat a pabuniagan ket masapul a masursuroan nga umuna iti Kristyano a pammati.

SIASINO TI MABALIN A MAMUNIAG?

Ti gagangay a mabalin a mamuniag ket t Obispo, padi ken diakono. Ngem no kasapulan la unayen (emergency cases), uray siasino agraman saan a nabuniagan a tao, ket mabalinna ti mamuniag no la ketdi aramatenna ti Nasantoan a Trinidad (Ama, Anak ken Espiritu Santo) ket aramidenna daytoy iti wagas a panangaramid ti Simbaan no mamuniag. Ipalubos ti Simbaan daytoy gaputa tarigagay ti Dios a maisalakantayo amin ket ti Buniag ket nasisita tapno maisalakantayo.

ANIA DAGITI IBUNGA TI BUNIAG?

1. Ti umuna nga ibunga ti Buniag ket iti pannakaikaysa ti mabuniagan kenni nagungar a Hesus babaen iti danum ken Espiritu Santo. Matay ti mabuniagan iti sidong ti basol ket mayanak manen iti baro a biag ken Kristo. Ti mabuniagan ket agbalin a pannakaanak (adopted child) ti Dios ket maawagan nga agbiag iti kinasingpet.

2.   Babaen iti Buniag, amin a basol (basol a tawid ken  personal a basol) ket mapakawan agraman dagiti dusa ti basol. Makikaysa ti mabuniagan iti panagtutuok, ipapatay ken panagungar ni Kristo.

3. Maitipon ti mabuniagan iti gimong dagiti mamati nga isuda ti mangbukel ti Bagi ni Kristo nga isu ti Simbaan.

ANIA DAGITI RUMBENG NGA ARAMIDEN TI NABUNIAGAN?

1. Gaputa naisalakan iti patay (basol) gapu ken Kristo, masapul a ti nabuniagan ket am-ammoen ken ayatenna ni Hesus a mangisalakan.

2. Masapul nga agbalin a napinget ken nabunga a kameng ti Simbaan a nakaikapponanna.

3. Taripatoen ken agdur-as koma iti baro a biagna ken Kristo babaen iti kararag ken dagiti Sakramentos nangruna ti Eukaristia.

4. Masapul a nakaturong ti kananakemna kadagiti banbanag nga adda iti ngato (adda’t sadi langit) ket kanayun a nakasagana a sumango iti Apo no umayto manen.

ANIA DAGITI PAGREBBENGAN DAGITI NAGANNAK ITI              MABUNIAGAN?

1. Kitaen dagiti nagannak a mabuniagan a dagus dagiti annakda.

2. Isuda ti umuna a katekista dagiti annak ket isuroda ida kadagiti bilin ti Dios ken Simbaan.

3. Masapul a dagiti nagannak ti mangisuro kadagiti annak nga aglualo kadagiti lualo ti Simbaan (Tanda iti Krus, Amami, Ave Maria, Gloria, Mamatiak, etc.).

4. Iturongda dagiti annakda tapno sansanenda nga awaten dagiti Sakramento nangruna ti Komunion iti Misa.

5. Masapul nga ammo dagiti nagannak ken ibiagda ti pammatida a Nakristyanoan. Babaen iti daytoy,    agbalinda a nasayaat a pagwadan kadagiti annakda.

ANIA TI AKEM DAGITI MANGANAK TI BUNIAG?

1. Tumulongda kadagiti nagannak tapno maisuro iti Kristyano a panagbiag ti ubing nga inanakda.

2. Isuda ti mangako ti akem dagiti nagannak no dida kabaelan nga aramiden ti akemda nangruna iti pannakaisuro ti pammati iti ubing.

3. Ti manganak iti Buniag ket masapul a Katoliko a nabuniagan ken nakonfirmaan ket immawaten iti Eukaristia.

4. Ti manganak ket masapul a saan a naub-ubing ngem 16 anyos ti tawenna.

5. Masapul nga isu ket pagwadan iti anakenna babaen iti panangibiagna ti Katoliko a pammatina. Ngarud saan a maipalubos a manganak ti saan a Katoliko.

GIBUSNA. ISARUNOTAYTO NGA ADALEN TI SAKRAMENTO TI KONFIRMA. KABAYATANNA, ADALEN A KAS PAMILYA TI SAKRAMENTO TI BUNIAG A NAIPARANG KADATAYO. (*)

Baro nga annayas ti BEC mairubbuat

Hulio 8-9, 2011 - Nagtitipon dagiti papadi, katekista, pastoral workers, mangiwanwan gimong, parishanimators ken dadduma pay a pumarokya ditoy Bikariato  Santa Cruz, Ilocos Sur para iti maikasiam a Taripnong Pastoral ti Santa    Teresita (TAPASTE 9).

   Agdagup iti 210 a delegados ti dimmar-ay a naggapu kadagiti siam a parokya ditoy bikariato ni Santa Teresita.

   Ti kangrunaan a nagpapatangan ket isu iti panagiburay ti tunggal parokya ti bukodda a programa-pastoral. Ditoy a naammoan ti nagduduma a wagas ti panangipataray ti aktibidades dagiti parparokya ket ti awag a mangipagna ti pannakaurnos dagiti Basic Ecclesial Communities (BEC) ket kasla nagmawmawen. Adda met dagiti parokya a mangikarkarigatan ti  mangpasantak kadagiti BEC.

   Gapu iti daytoy, naiparang manen kadagiti agserserbi ti Simbaan ti baro a wagas a mangurnos kadagiti BEC. Naipalagip kadakuada a ti BEC ket saan a maysa a banag a maisuro laeng ngem ketdi maysa a wagas panagbiag dagiti  gimong. Masapul a dagiti mangiwanwan ti pannakaurnosda ket makipaset wenno makipagbiagda iti dayta a BEC.

   Inbinsa-binsa manen ni Fr. Arwin Romulo Rebollido dagiti annayasna ket insingasingna nga irugin dagiti parokya ti prosesona. Ti nasao a proseso ket isu met laeng a wagas ti ar-aramaten ti parokyatayo ditoy Alilem.

   Kalpasan ti adal, inwanwan ni Fr. Reynaldo Rebebes ti ababa a recollection a ti temana ket maipapan iti Naimbag a Pastor (Good Shepherd). Naipalagip kadagiti nakipaset a masapul nga umaspingda met iti kinaimbag ni Hesus a kas pastor iti panagtrabahoda.

   Naigibus ti taripnong babaen iti Nasantoan a Misa. Ditoy a naiyam-ammo ni Rev. Feliciano Bugtong, Jr. kas baro a kameng ti bikariato. (*)

Primera komunion nasapa a naipaay

Tallo a pagadalan ti elementarya ditoy ili nga Alilem, Ilocos Sur ti nakaipaayan ti Primera Komunion iti maikadua pay laeng a bulanti panagbabasa. Isuda dagiti sumaganad: Alilem Central School (Hulio 1, 2011), Dalawa Elementary School (Hulio 7, 2011) ken Palasipas Elementary School (Hulio 28, 2011).

   Gaputa binulanen a marambakan ti Nasantoan a Misa kadagiti amin a pagadalan, naisapsapa metten ti Primera Komunion tapno ad-adu ti makapag-Komunion nga ubbing.    Dagiti adda iti Grade III ti napagasatan a nakaipaayan daytoy.

   Kas iti nairugrugin a wagas a  pannakaisagana dagiti ubbing, naigunam-gunam ti dakkel nga akem dagiti nagannak. Isuda ti inwanwan dagiti Parish Animators’ Team nga agakem a kas katekista kadagiti annakda. Nadutokan dagiti nagannak a mangisuro kadagiti ubbing nga agprimera-Komunion nga agkararag. Isuda pay ti mangisuro no kasano ti ag-Konfesar ket kinadduada ida iti umuna a panagkonfesarda. Napakaammoan dagiti nagannak kadagiti akemda babaen iti ababa a recollection.

   Ti kaadda ti ama ken ina ti ubing ti nagbatayan ti parokya tapno ipaayna ti nasao a Sakramento. Masapul nga adda dagiti agasawa sakbay ken kabayatan ti Primera Komunion malaksid no awanda, pimmusayen wenno adda napateg a rason. Naipalagip ngamin kadakuada nga isuda ti kangrunaan a maseknan iti nasao a pasamak.

   Kalpasan ti Primera Komunion, adda napasamak a rambak-gimong a no sadino ken napasangbay dagiti ubbing kas napateg a kameng ti gimong ket irugidan ti agakem ken makipag-annong. Ditoy met a naiyawat dagiti Certificates of First Communion. 

Iti panagtultuloy ti panagbabasa, maitultuloy met kadagiti dadduma a pagadalan ti Primera Komunion.

   Iti bulan ti Agosto, maigannuatto ti Primera Komunion kadagiti sumaganad nga eskwelaan: Apang Elementary School (Agosto 12, 2011), Amilongan Elementary School (Agosto 18, 2011) ken Anaao Elementary School (Agosto 31, 2011). Mabalin a mabaliwan ti naituding nga aldaw no adda   napateg a pasamak a mabalin a makalapped.  (*)