Proyekto ti PnP main-inaw

Simmarungkar ditoy parokya ni Nuestra Señora de Lourdes, Alilem, Ilocos Sur ti mangimatmaton iti Caritas Nueva Segovia a ni Sr. Liliam Carranza, OSB idi Hulio 19, 2011 tapno igannuatna ti umuna nga addang ti mapaspasungadan a proyekto nga ipaay ti Pondo ng Pinoy (PnP).

Sagbibinting a naggapu kadagiti pamilya ti Alilem, Ilocos Sur.

   Ti parokya iti Alilem ket aktibo a mangitultuloy ti Pondo ng Pinoy. Tunggal bulan nanipud pay idi Agosto 2010, adda isubsubmitir ti parokya a naurnong a sinsilyo nangruna kadagiti sagbibinting (25 centavos) iti opisina ti Caritas Nueva Segovia idiay Vigan City, Ilocos Sur. Daytoy metten ti namungayanan iti nasao nga opisina a makiuman iti National Office ti Pondo ng Pinoy tapno mangipaayda ti kasapulan a proyekto para iti ili nga Alilem nangruna iti panangiyaon iti kinarigat dagiti napanglaw.

   Iti pannakiuman ni Sr. Lilian kadagiti parish animators, ken ni Mr. Placido Daweng, naipakaammo nga adu dagiti annak ti saan a makabasa iti kolehiyo ken adu met dagiti awanan pagsapulan. Naisingasing kenni Sr. Lilian nga adda koma maited a Vocational Courses kadagiti umili nga ipaay ti Technical Education and Skills Development Authority (TESDA). Babaen iti daytoy a pamuspusan, maikkan dagiti makipaset kadagiti certificates a mabalinda nga usaren a pagaplikar iti trabaho.

   Mapanpanunot dagiti mabalin a kurso a maited kadagiti umili kas iti Carpentry, Welding Skills, Dress Making ken dadduma pay. Napintas no agpaay dagitoy para kadagiti lallaki ken babbai. Maitedto dagitoy a libre.

   No matultuloyto, masimpa ti daan a multi-purpose hall a masarakan iti ngato ti konbento-parokya tapno isu ti mausar a pagturogan dagiti estudyante. Mabalin met nga usaren ti Dap-ayan Parokya nga isu ti lugar a pagadalan. Masansan ngamin a maited ti tunggal kurso iti las-od ti makabulan wenno nasursurok pay.

   Ti maysa pay a mabalin a proyekto nga ited ti Pondo ng Pinoy ket isu ti pondo a mangtulong iti pannakaimplementar ti organiko a panagtalon nga manarimaan a padpadasenen dagiti sumagmamno nga umili. Ti pondo ket mausar a paggatang kadagiti kasapulan a makina ken materyales.

   Kalpasan iti panangammo ken panangadal ti opisina ti Caritas ti  kasasaad ti Alilem, makipasetto da Sr. Lilian iti maysa a seminar ken training tapno maammoanda no kasano a pagbalinen a nasayod ti proyekto.

   Kabayatanna, maiyawis kadagiti amin a pumarokya ken pamilya ti agtultuloy a panangsuporta ken pannakipaset iti Pondo ng Pinoy. Dagiti dita’y kaykayat a sagbibinting wenno  sinsilyo ket urnongentayo nga addaan iti kananakem a tarigagayantayo a tulungan dagiti nakurapay. Pagbalinen daytoy a sistema ti panagbiag nga iti inaldaw, malagip ken adda aramidentayo para kadagiti napanglaw. Babaen iti daytoy, ni Apo Dios nga hustisya ket maay-ayo kadatayo ket isunto ti manggunguna kadatayo.

   Maawistayo nga umay mangala ditoy opisina ti parokya ti Pondo ng Pinoy labels nga isu ti ipigkettayo kadagiti pagkargaantayo kadagiti sinsilyo.  (*)