Papadi ti NS immubing

Hulio 18-22, 2011 - Naangay ti Annual Retreat dagiti papadi ti Arkidiosesis ti Nueva Sagovia idiay Betania Retreat House, Baguio City.

   Kadagiti tinawen a pannakaaramid ti nasao a naespirituan a programa para kadagiti papadi, naidumduma ti wagasna ita a tawen. Nagbalin ngamin a kasla babassit nga ubbing dagiti papadi ti Ilocos Sur. Daytoy ti wagas nga inaramat ni Fr. Philip Lasatin, ti napili a Retreat Master. Ni Fr. Philip ket naggapu idiay John Vianney - Galilee Development and Retreat Center, Galilee, Tagaytay City.

   Naikkan ti tunggal padi a nakipaset iti pagkolor ken drawing books. Dinawat ni Fr. Philip a saan nga  agsurat dagiti papadi no madama dagiti talks ngem ketdi, dawatenna nga ag-drawing da kadagiti aniaman a ladawan a mangiparang ti nakitada nga adal, kinapudno, ken sursuro.

   Ubing ken nataengan man a padi, pinadasna ti pintas ti agbalin nga ubing manen. Ditoy a narikna ti nagpaiduma a ragsak - ti ragsak a masansan a marikna dagiti ubbing.

   Tapno mapabaro ti gagar ken regta dagiti papadi a mangituloy ti misyonda, tinakkuatda dagiti     pondasyon ti kinataoda ken agdama a pagtaktakderanda. Nairugi daytoy iti bukod a pannirigan ti tunggal maysa maipapan iti Dios. Naduktalan dagiti    papadi a no ania ti kaunaan a malagipda a ladawan dagiti bukodda nga amma (tatang), isu met ti umuna ken agdama a panniriganda iti Dios.

   Naamiris ngarud dagiti papadi iti pateg ti akem iti ama ti pamilya iti panangiyam-ammo kadagiti annak no siasino ni Apo Dios.

   Tapno maikkan ti tunggal maysa iti tiempo a mangpauneg pay kadagiti adal nga imburay ni Fr. Lasatin, mamindua tunggal aldaw ti pannakaaramid ti Holy Hour (bigat ken rabii). Inaldaw met a naidaton ti Nasantoan a Misa. Naikkan met ti gundaway nga agpapatang dagiti agkakatawen a papadi tapno iburayda dagiti personal a naadalda iti retreat. (*)