DAMDAMAG PAROKYA 3

Arzobispo dinayawna ti Ayus Misyon

Simmangbay ditoy parokya ni Nuestra Seńoda de Lourdes, Alilem, Ilocos Sur ni Most Rev. Ernesto A. Salgado, D.D., arzobispo ti Nueva Segovia idi Oktubre 23, 2011. Daytoy ti maawagan a Bisita Pastoral a no sadino ket sarungkaran ti kangatoan a padi dagiti mamati nga agindeg iti parokya tapno ammoenna ti kasasaadda ken tapno isurona ida.

   Ti rambak-Misa a nagtitiponan dagiti pumarokya ket indauloan ti arzobispo. Ditoy nga inpalagip ni Apo Erning ti anag iti panagayat - a saantayo a maayat ni Apo Dios no saantayo nga ammo ti agayat iti padatayo a tao.

   Kalpasan ti rambak-Misa, nagbati dagiti agserserbi iti parokya a kas kadagiti agasawa a mangibagi   kadagiti gimong, parish animators, Ministro ti   Komunion, Lectors, Commentators ken mangibagi kadagiti agtutubo. Isuda ti nakisao iti arzobispo        babaen iti panangiparangda ti kasasaad ti parokya. Ditoy a dinayaw ni Apo Salgado ti newsletter nga Ayus Misyon nga isu ti mangistorya ti panagdaliasat ti parokya nga   agbibiag dagiti pumarokya kadagiti bukodda a Basic Ecclesial Communities (BEC). Ditoy met a naiparang ti kasasaad-pinansial ti parokya.

   Ti napateg a naaramid ket isu iti panangisuro ni Apo Arzobispo kadagiti nakipaset iti taripnong. Inparangna dagiti           nadumaduma a langa ti parokya ket inyawisna iti panangpatibker ken   panangurnos kadagiti BEC. Agbatay koma ti biag dagiti gimong iti Sao ti Dios nga isu ti mangiturong ti     wagas panagbiag.

   Ti Bisita Pastoral ket naigibus babaen iti panangkita ti arzobispo kadagiti Canonical Books ti parokya a kas iti Book of Baptism, Book of Confirmation, Book of  Marriage, Book for the Dead, Book of Mass Intensions, Pastoral Letters, ken Libro ti Patangan Parokya. Kalpasanna, pinirmaanna dagitoy kas panangpasingkedna kadagiti pinasamak ti parokya. (*)