PANNAKAIBUTAKTAK TI MAIKATLO A PALIMED TI FATIMA

Idi Mayo 13, 1917, ni Lucia Santos kadduana dagiti kasinsinna nga Jacinta ken Francisco Marto ket napanda nagipastor kadagiti karnero iti lugar a maawagan Coya da Iria nga asideg ti balayda idiay Fatima,   Portugal. Kabayatan ti panagpastorda, nagparang ti maysa a babai. Kinuna daytoy a babai kadakuada a mangipaayda ti aramid iti kaasi ken panagbabawi. Padasenda ti agsagaba tapno maisalakan dagiti managbasol. Kiniddaw pay daytoy a babai nga ag-Rosarioda iti inaldaw ket no masansan ti panag-Rosario, umapay ti kappia iti    tunggal maysa ken iti sangalubongan. Mapapati a ni Apo Santa Maria ti nagparang kadakuada.

Segun iti panagistorya ni Lucia, adda inpakaammo daytoy a babai a tallo a palimed. Nagbalin a naannad ti Simbaan iti panangipablaakna kadagitoy a palimed. Dagiti dua ket naammoan nga   insigida ngem ti maikatlo ket nabanayad iti pannakaipablaakna.

Iti daytoy panangigibustayo iti Bulan ti Santo Rosario (Oktubre) ken iseserrektayo iti Bulan ti Lagip-Minatay (Nobyembre), napintas a pagpanunutantayo ti naipablaak a maikatlo a palimed nga inbaga ni Apo Santa Maria kadagiti tallo nga ubbing. Segun ken Lucia, ni Apo Santa Maria met laeng ti nagkuna a nasken nga maiwaragawag daytoy kadagiti AMIN a tao. Napateg ngarud met a maammoantayo a taga Alilem daytoy.

 

Manipud iti libro a napauloan FATIMA THE GREAT SIGN: The Urgent Message for Today! nga insurat ni Francis Johnston, maiparang ti mensahe ken kaipapanan ti maikatlo a palimed (Third Secret of Fatima). Iparangna pay ti umisu a pannirigan ti Simbaan. Daytoy ti opisyal a pannakaipatarusna manipud iti pagsasao ni Lucia a Portuguese iti pagsasao nga Ingles. Iti daytoy a serye ti Katekismo, padasentayo met nga ipatarus iti Ilokano   dagiti napapateg a paset ti libro.

TI MAIKATLO A PALIMED TI FATIMA

Iparangarang ni Lucia ti Maikatlo a Palimed ti Fatima

Uray ania a Kredo wenno relihiyon, nasaysayaat a nakasagana ken kanayon a makigayyem iti Dios,… ti namarsua; gaputa saantayo nga ammo no kaano a panawantayo daytoy a lubong…

TI MAUDI A PALIMED TI FATIMA

Impalubos ti Simbaan a maiparangarang kadagiti tattao ti maudi a paset ti mensahe. Ti Nagasat a Birhen ket nagparang kadagiti tallo nga ubbing idiay Fatima, Portugal idi 1917… pudno a napasamak daytoy; maysa kadagitoy nga ubbing ket ni Lucia (natay laeng idi Pebrero 13, 2005).

Maysa a mongha a madre, ken nagnaed iti monasteryo  idiay Portugal. Damo nga impakaammo ni Lucia ti mensahe ken ni Santo Papa Pio XII, isu a kalpasan ti panangbasana, sinelyoanna ken indulinna tapno saan a maammoan ti kaaduan. Kalpasanna, binasa met ni Santo Papa Juan XXIII, ket kaskasdi met ti inaramidna a kas iti sinukatanna a Santo Papa, inlemmengna tapno saan a makita ti kaadduan gaputa ammona a no maammoan; umapay ti pannakaupay ken  panagdanag ti sangkataoan.

 

Ngem ita nadanunen ti tiempo, ken ti pammalubos ket inteden ni Santo Papa Juan Paulo II nga iparang daytoy kadagiti annak ti Dios;….saan nga isu ti makaigapu iti pannakaburibor, ngem tapno mapakaammoan dagiti tattao ti Dios iti napateg a  mensahe ken makasaganada.

Kinuna ti Birhen ken Lucia:

“Inka, anakko, ket ipakaammom iti lubong ti mapasamakto manipud tawen 1950 agingga 2000. Saanen a tungtungpalen ti tao dagiti  Bilin nga inted ti Dios. Kinadakesen ti agari iti lubong ket agapit iti gura ken kinapait iti sadino man a disso. Agaramidto ti tao kadagiti naranggas nga armas a mangdadael ti lubong uray iti minutos laeng!.... a no sadino ket kaguddua ti kaputotan ti tao ket madadael. Ti gubat ket mairugi iti panangkontra iti Roma, ken addanto apa kadagiti gunglo dagiti religioso….”

“Ipalubosto ti Dios dagiti gagangay a pagilasinan a kas iti asuk, nalamiis a tudo, lam-ek, danum, puor, layus, ginggined, angin ken dakes a paniempo nga isu ti in-inut a mangpasayaat ti planeta.”

Dagitoy a pasamak ket dumteng sakbay iti tawen 2012.!!!

 “Dagiti saan a mamati...daytoy ti kanito...Ti ay-ayatem nga ina ibagana kenka: ...dagiti kurang ti panagparaborda iti sabali, iti sao ken aramid, dagiti saan nga agayat iti kaarrubana a kas iti panagayat kadakayo amin ti ay-ayatek nga Anak … saandanto a makalasat!  Kalikagumandanto a matayda la koman.”

“Dusaento a napalalo ti Dios dagiti saan a mamati kenkuana, dagiti mangtagibassit kenkuana ken dagiti awan iti tiempona nga agpaay kenkuana. Awagankayo amin nga umasideg iti anakko a ni Hesu-Kristo. Tulunganto ti Dios ti lubong, ngem madadaelto dagiti saan a kumanunong ken agtalek kenkuana!”

Ni Padre Agustin a agnanaed idiay Fatima, kinunana nga  pinalubosan isuna ni Santo Papa Paulo VI tapno sarungkaranna ni Sister Lucia, a mongha (saan a rimrimuar iti monasteryo ken saan a mabalin a masarungkaran). Kinuna ni Padre Agustin nga inawat isuna ni Lucia a napnoan rag-o ket kinunana kenkuana:

“Apo, ti Nuestra Senyora ket agleddaang la unay gaputa awan a pulos ti interesado iti impadtona idi tawen 1917, numan pay adda dagiti nalinteg nga agdaldaliasat iti nailet a dalan, dagiti managdakdakes ket agdakdakiwasda iti nalawa a dalan nga agturong a mismo iti pannakadadael! Mamatika kaniak, Apo, ti dusada ket umadanin. Adunto a kararrua ti mapukaw ken adunto a pagilian ti mapunas ditoy daga.”

“Ngem, iti baet dagitoy a pasamak, no ti tao ket agpanunot a nalaing, agkararag ken agbalin a napudno, agaramid iti nasayaat, agparabor ken agrespeto, ti lubong ket maisalakan… Ngem, no ti tao ket saan a mamingga iti dakes nga aramidna… naagum, addaan gura, managimbubukod a kababalinna, makisinnuppiat ken makiapa, ti lubong ket mapukawto iti agnanayon! Immayen ti tiempo kadatayo amin nga iwaragawagtayo iti mensahe ti Nagasat a Babai kadagiti pamilya, gagayyem ken iti  entero a lubong.”

“Ituloyyo ti agkararag, agbabawi ken agsakripisyokayo. Asidegtayon iti maudi a minuto iti maudi nga aldaw ket dagiti didigra ket umaydan. Gapu iti daytoy, adu kadagiti adayo iti Simbaan ti agsublinto iti silulukat nga abrasa ti Simbaan ni Hesu-Kristo.”

“Ti panagtitipon dagiti simsimbaan ket agtungpalto iti Maymaysa, Nasantoan, Katoliko ken Apostolado a Simbaan; …. ti England, Russia, China, Judio, Buddhists, Muslims, Hindus, Protestante, ken dadduma pay… Aminto ket agsublida a mamati ken agdaydayaw iti Dios a Namarsua, iti sidong ti ay-ayatenna nga Anak ken ni Naingasatan nga Ina, Birhen Maria.”

ANIA TI AGUR-URAY KADATAYO?

“Iti amin a disso addanto nainkappian a panagpapatang, ngem addanto latta ti pannakadusa. ADDANTO TAO A NANGATO TI AKEMNA TI MAPAPATAY (assassinated) KET DAYTOYTO TI MANGRUBROB TI GUBAT. ADDANTO NABILEG NGA ARMADA A MANGSAKOP ITI SIBUBUKEL A EUROPA KET TI NUCLEAR WAR KET MANGRUGI 

“Daytoy a gubat ti mangdadaelto iti amin; agsipngetto iti amin a disso iti 72 nga oras (tallo nga aldaw) ket ti  apagkatlo ti sangkataoan a makalasat iti daytoy a kinasipnget ken panagsagaba ti mangiruginto iti baro a puli; nasayaatdanto a tattao.”

“Iti nakalamlamiis a rabii, sangapulo a minutos sakbay ti tengnga ti rabii, addanto NAPIGSA A GINGGINED a  manggaraw ti daga iti walo nga oras. Daytoyto ti maikatlo a pagilasinan a ti Dios ket Dios a makinkukua ti daga.”

“Kadagiti nalinteg ken mangiwaragawag ti pammati, ti mensahe ti Babai ti Fatima ket: SAANTAYO NGA AGAMAK. DIKA AGBUTENG.” 

ANIA TI MASAPUL NGA ARAMIDEN?

Agdumog, agparintumeng ken agdawat iti Dios ti pammakawan, ta dagiti laeng naimbag ken saan nga iturayan iti kinadakes ti makalasat iti dayta a  didigra.  

 

“Ibagak kadakayo dagiti pagilasinan, tapno makasaganakayo ket agbiag ken maikanawakayo: ADDANTO NAKARO A PANAGSENNAAY… KALPASANNA, MAGINGGINED ITI  NAPALALO TI DAGA.

“Nakakaam-amesto ti ginggined a mangiyalis ti daga iti 23 degrees ken agsubli met laeng iti sigud a lugarna. Kalpasanna, agsipngetto iti napalalo ti entero a lubong.”

“Makipulapolto a siwawaya dagiti dakes nga espiritu a mangdangran kadagiti kararua a saan a  nangipangag ti mensahe ken saan a nagsupapak iti basbasolda.”

Kadagiti napnoan pammati, laglagipenyonto ti mangsindi iti nabenditaan a kandela, mangisaganakayo iti altar nga addaan crucifix (krus nga adda imahen ni Jesus a  silalansa) tapno makisaokayo iti Dios ken dawatenyo ti di’ agsarday a   kaasina.”

“Nakasipsipngetto ti aglawlaw, ket AGPARANGTO ITI TANGATANG TI NATAN-OK A KRUS a mangipalagip kadatayo ti pinagbayad ti ay-ayatenna unay nga Anak para iti                    pannakaisalakantayo.”

“Dagiti laeng NASANTOAN A KANDELA ti makasilaw iti uneg ti balay. No nasindianen, saandanto pulos maiddep agingga a mapalabas ti tallo nga aldaw a kinasipnget.”

“Mangisaganakayo pay iti nabenditaan a danum nga iwarisyonto kadagiti tawa ken ruangan. Salakniban ti Apo dagiti sanikua dagiti nasantoan nga annakna.”

“Agparintumengkayo iti sango ti krus ti ay-ayatek unay nga Anak, kararagenyo ti Santo Rosario a kalpasan ti tunggal ‘Ave Maria’ ket kararagenyo: O DIOSKO, PAKAWANENNAKAMI KADAGITI BASBASOLMI, IKANAWANAKAMI ITI APUY SADI IMPIERNO, ALAEM SADI LANGIT DAGITI AMIN A KARARUA, NANGRUNA DAGITI MAKASAPUL UNAY TI KAASIM. O BIRHEN SANTA MARIA, SALAKNIBANNAKAMI, AY-AYATENDAKA. ISALAKANNAKAMI KEN TI ENTERO A LUBONG.”

“Kararagen iti mamin-lima ti Mamatiak ken ti Santo Rosario a palimed nga agturong iti Di’ Natolawan a Puso ni Santa Maria. Dagiti amin a mamati iti saok, inkayo ket iwaragawagyo iti amin.”

“DIKAY AGBUTENG! AWAN RUMBENG A PAGBUTNGANYO INTON DUMTENG TI ALDAW TI APO.”

“Kasaritayo amin a tao ita ta adda pay tiempo.Sungbatanto dagiti saan a nangiwaragawag iti mensahe ti pannakadadael dagiti kararua a saan a nakangngeg iti mensahe.

“Ikanawanto ti langit dagiti sipapakumbaba a mangkararag iti Santo Rosario. Tulongakto dagiti  naikari a matay a pumusay a sikakapia, ket nasantoandanto a sumrek iti lubong.” 

“Idawdawatko nga amin nga annakko ket maki-Misada iti umuna a Biernes ken umuna a Sabado iti tunggal bulan; agkonfesar ken agkomunionda; ket babaen iti dayta,            maisalakan ti lubong iti saknap a pannakadadael.”

“Nakarimrimonto ti pannakadadael dagiti tattao a saan latta a mamati kalpasan ti nakaro a ginggined. Agpul-oyto ti makadidigra nga angin iti amin a disso, ket sumingisingto ti init.”

“Mabalin a makalasatka iti dayta a didigra. Dimo liplipatan a nasantoan ti panangdusa ti Dios, ket NO NANGRUGIN, SAANKA PULOS RUMUAR WENNO SUMIRIP/KUMITA ITI RUAR URAY ANIA TI MAPASAMAK. SAAN A KAYAT TI DIOS A MAKITA TI URAY SIASINO NGA ANAKNA TI PANANGDUSANA KADAGITI MANAGBASOL.”

Naglaon amin dagitoy iti Nasantoan a Surat: Lucas 21:5-10; 21:12-28; 21:30, Isaias 40:1-5, 9

Ipalubos ti Dios a mapasamak dagitoy. Ur-urayen ti Santo Papa ken dagiti Obispo ti mensahe maipanggep iti panagbabawi ken kararag. Saan a pamutbuteng ti Sao ti Dios no di ketdi Naimbag a Damag. Agaramidkayo iti kopya daytoy a mensahe tapno maammoan ti amin ket maaddaantayo amin iti gundaway nga agbabawi ken maisalakan.

Ditay’ ammo no mamati wenno saan dagiti umawat iti mensahe, ngem panunotem nga adda naimbag a rason no apay a naawatmo daytoy a mensahe manipud iti Dios a namarsua ken mangay-ayat unay kadatayo.

Mangmangted ti Namarsua kadatayo iti gundaway a maisalakantayo, aniaman ti relihion ken pammatitayo. No saanmo patien ti mensahe, iyawatmo iti sabali.

Kadagiti umawat, isuda a mismo ti mangutob ken agdesisyon. Nabilbilegtayo a mangpaksiat iti kinadakes no ibiagtayo dagiti Bilin ti managayat nga Amatayo, sangapulo laeng a bilin a no ibiagtayo ket magun-odtayo iti pammakawan ti Dios. AMEN. (*)

(GIBUSNA)