DAMDAMAG PAROKYA ITI BULAN TI ENERO 2012

Rev.  Angelito grasya iti parokya

Ni Rev. Angelito kabayatan iti panagiburayna iti Misa pagadalan idiay Brgy. Anaao, Alilem, Ilocos Sur

“Sino ngata daytoy a kabarbaro a rupa?”

   Daytoy ti kinuna ni Mr. Solomon Baltazar sakbay a nangrugi ti Misa idiay Gimong Anaao Proper, Brgy. Anaao, Alilem, Ilocos Sur idi Enero 18, 2012. Nakitana ngamin ni Rev. Angelito de Gracia a kaddua idi ni Fr. Arwin Romulo Rebollido a napan nag-Misa iti nasao a lugar. Isu pay ti nangipaay ti pagpanpanunutan kabayatan ti rambak-Misa iti dayta nga rabii.

   Ni Rev. Angelito ket maysa kadagiti tallo a diakono ditoy arkidiosesistayo a kaklase ni Rev. Feliciano Bugtong, Jr. Inbaon ni Arzobispo Ernesto Salgado ditoy ilitayo tapno makipagnaed ken makipaset iti misyon ti parokya sakbay a maordenan a padi intono Mayo 29, 2012 idiay Santa Maria, Ilocos Sur, ti lugar a nakaiyanakanna. Simmangpet ditoy parokyatayo idi Enero 16, 2012.

   Iti naangay a Patangan-Parokya 36 idi Enero 29, 2012, inyebkas dagiti sumagmamano a  nakipaset ti  panangdayawda ti napintas ken  nabagas a panagiburay ni Rev. Lito iti Misa. Ditoy met nga impeksa ti diakono ti ragsakna gapu kadagiti napipintas a kapadasanna iti las-ud laeng ti dua a lawas. Ni Fr. Rebollido, kura paroko, inpakaammona met iti nasao a panagtitipon a dakkel ti maitulong ni Rev. Lito kadagitoy a panawen nangruna ta adu dagiti mapadpadaanan a programa ken  aktibidades. (*)

Panagkaykaysa narikna iti fiesta ti Apang

Agsasala dagiti ubbing kabayatan iti paay-ayam!

Enero 25, 2012 - Fiesta ti Panagbalbaliw ni San Pablo ken fiesta met ti Gimong Apang, Brgy. Apang, Alilem, Ilocos Sur.

   No adda man mabalin a balikas a pangiladawan iti nasao a lugar, awan sabali no saan a ti panagkaykaysa. Napaliiw ngamin ti kaadda ti kaadduan ken ti panagtitinnulong dagiti lumugar tapno maparungbo ti ramrambak.

   Naammoan nga adda naaramid nga urok wenno panangisagut kadagiti sanikua tapno adda mapagsasangoan a makan kalpasan ti Nasantoan a Misa. Adda met naisagana a premyo kadagiti pay-ayam kadagiti ubbing ken nataengan. Naiparang met  ditoy ti tradisyonal a  panag-sayaw kas paset iti kultura tapno maipasimudaag ti kinaragsak dagiti lumugar.

   Ti nasao nga aldaw ket napadaeg pay gapu iti kaadda dagiti ubbing nga agbasbasa. Nangipaayda kadagiti nadumaduma a pabuya a pangray-aw kadagiti tattao.

   Nairana met ditoy ti pannakaaramid ti Sagut-Apit iti nasao a gimong kas pagyaman iti Dios a nagtaudan ti amin a kinaimbag. (*)