KANANAKEM PUMAROKYA NAKATURONG ITI MAYO 28

Madama nga agsasao ni Rev. Feliciano kaabayna dagiti nagannak kenkuana idi Patangan Parokya 36.

Naitudingen ti mapadpadaanan nga aldaw a pannakaorden ni Reberendo Feliciano Bugtong, Jr. iti Sakramento ti Kinapadi! Mapasamak daytoy intono Mayo 28, 2012 ditoy parokya ni Nuestra Seńora de Lourdes, Alilem, Ilocos Sur.

   Nanipud pay sakbay a naordenan a Diakono ni Rev. Bong idi Hunio 2011, naipagpaganetgeten kadagiti pumarokya a ti nasao a pannakaital-ona ket saan laeng a para kenkuana ken ti pamilyana no di’ ket pay kadagiti amin a pumarokya. Ni Rev. Bugtong ket nagtaud iti bukodtayo a gimong ken parokya ngem napili nga agserbi iti sibubukel a Simbaan. Isu ti saguttayo iti Simbaan Lokal ditoy Arkidiosesistayo.

   Ti Patangan Parokya 36 idi Enero 29, 2012 a  naaramid iti uneg ti simbaan-parokya ket nagserbi a gundaway a mapagtitinongan ti nasao nga ordinasyon. Ditoy a nakipaset ni Rev. Bong ken dagiti nagannak kenkuana tapno kas maysa a gimong dagiti mamati, sangsangkamaysatayo nga agsagana.

   Inparang ti Diakono dagiti kasapulan ken mapasamak iti rambak-ordinasyon tapno adda pamalatpatan dagiti nakipaset a mangibagi ti gimong. Ditoy a narikna ti nagpaiduma a ragsak ken gagar ti kaadduan ket immanamongda a makipaset ken makipag-annong.

   Ti kangrunaan nga impakaammo ni Rev. Bong ket isu ti naespirituan a panagsaganatayo amin. Dawatenna a datayo a pumarokya ket matubaytayo tapno maawatan ken ipategtayo ti kinapadi. Mapasamak daytoy intono bulan ti Mayo 2012 babaen iti adal-gimong ken naespirituan nga aktibidades. Mapan ag-retreat dagiti tallo a Diakono intono bulan ti Abril 2012 ken kalpasanna, agawidton ditoy ilitayo tapno agsagana.

   Naiparang iti nasao a panagtitipon a namnamaentayo ti panagsangpetto dagiti sangsangaili manipud nadumaduma a lugar a pakairamanan dagiti papadi, relihioso, ken kakabsat a makaam-ammo ken Rev. Bong. Nasken ngarud a saganaentayo ti pagturogan dagiti agsangpeten sakbay ti Mayo 28. Kasta met dagiti makan nangruna iti kaaldawan ti ordinasyon ket masapul a maplanon no kasano a patauden ken kasano ti wagas a panagpakan.

   Ninayunan ni Fr. Arwin Romulo Y. Rebollido, kura paroko, ti pagpanpanunutan dagiti nakipaset. Inpalagipna a ti mapasamak nga ordinasyon ket nangatngato pay ngem iti Rambak Kristo Ari a napasamak idi Nobyembre 1998 a no sadino ket ti Alilem ti host parish ti archdiocesan celebration. Maysa daytoy a rambak-liturhiya nga ar-aramidentayo iti tinawen. Ngem, iti ordinasyon ti kinapadi ket kanito a maisaad ti maysa a lalaki nga agbalin nga Alter Christus (sabali a Kristo wenno mangibagi ken Kristo). Ket intono agbalinen a padi ni Rev. Bugtong, amin nga aramidna ket in persona Christi (aramidenna iti kinatao ni Hesus).

   Napagtitinongan pay dagiti mangibagi kadagiti gimong nga agbalinton a paset ti pagpapatangan iti binulan a Patangan-Parokya ti mapasamak nga ordinasyon. Adda pay nasurok a tallo a bulan sakbay ti kaunaan nga ordinasyon ditoy Alilem. (*)

  

Dagiti mangibagi kadagiti gimong a magagaran unay iti mapadpadaanan a pannakaorden ni Rev Bugtong iti kinapadi. Madama ditoy ti Patangan Parokya 36.