DAMDAMAG PAROKYA ITI BULAN TI ENERO 2012 (2)

Katekismo panggep ti Rambak Santo Niño 2012

Dagiti agbasbasa idiay Sisters of Mary School ti nangidaulo ti kanta-kararag a panglukat ti programa.

Nabaliwan bassit ti pannakairussuat ti Rambak Santo Nińo ita a tawen ditoy parokya ni Nuestra Seńora de Lourdes. Makita daytoy kadagiti aktibidades a naaramid.

   Bunga daytoy ti masansan a pannakatingiting kadagiti pinasamak ti parokya iti tunggal bulan. Nakita ngamin idi napan a tawen dagiti sumagmamano a pagkapsutan ti nasao a ramrambak. Idi ket puro a pay-ayam ti naaramid kalpasan ti libut ken Misa. Ditoy nga adu dagiti nadagran nga ubbing ken nakita nga adda pay aggaapa gapu laeng kadagiti premyo. Nagbalin a saan a naurnos ti annayas numan pay daytoy ket pudno a naragsak a kanito nga agpaay kadagiti annaktayo.

   Ita a tawen ket nakissayan dagiti parlor games ngem nanayunan kadagiti pasalip nga addaan panggep a mangkatekismo kadagiti ubbing. Adda quiz bee a ti linaonna ket naggapu iti Biblia, maipanggep ti   Simbaan ken pammati. Adda pay kinnapintasan ti panangisala iti kararag nga Amami kadagiti Angels.

   Nabigbig ti naballigi nga annayas ti Rambak Santo Nińo 2012 idi Patangan Parokya 36 idi Enero 29, 2012. Adda pay madanagan amangan no awanton ti nasao a ramrambak intono umay a tawen gaputa agbaliwto ti kura paroko. Ditoy a naipakaammo babaen ken Fr. Arwin Romulo Rebollido nga  addanto maaramid a Panangtagikua ti Programa-Pastoral tapno agtultuloy dagiti nairugin nga annayas ti parokya. Nasisita daytoy tapno adda madanunan ti sumukat a padi nga programa ket saan a mangirubbuat manen iti sabali. Isunto laengen ti mangnayon ken mangpapintas pay ti pannakaipataray ti parokya. (*)

Sagut-Apit naiyam-ammo kadagiti  pagadalan

Nakapila dagiti ubbing idiay Daddaay Elementary School a mangidaton kadagiti sagutda

Immadu ti naurnong a sagsagut dagiti pumarokya ditoy Alilem, Ilocos Sur ita a tawen no idilig kadagiti naglabas a dua a tawen. Awan ti sabali a rason no saan a ti pannakaaramid ti Misa Sagut-Apit kadagiti pagadalan malaksid kadagiti gimong ken barangay.

   Dagiti ubbing ken mangisursuro kadagiti eskwelaan ket naawisda a nangiruknoy kadagiti bunga ti nagbannogan kas pagyaman iti Dios kadagiti nakaad-adu a paraborna.

   Ti liturhiya a naaramat iti nasao a rambak-Misa ket iturongnatayo iti panangamiris ti pateg iti panagyaman ken panangaramat kadagiti sagut met laeng ni Apo Dios.

   Ni Mr. Loreto Arzabal, Principal ti KIDAPAG Schools ti  nagkuna idi Patangan Parokya 36, a nakapatpateg a masursuroanen dagiti ubbing nga agyaman. Para kenkuana kas maysa a mangisursuro, adda     nasayaat a masakbayan dagiti ubbing no maiturongdan kadagiti nasayaat nga aramid pakairamanan iti pannakipaset iti misyon ti Simbaan.

   Naipakaammo iti nasao a panagtitipon dagiti mangibagi kadagiti gim-gimong nga awan ti Misa kadagiti    gimong iti bulan ti Pebrero ngem adda Misa kadagiti pagadalan. Maiyalisto laeng dagiti nakairuaman wenno   regular nga aldawda. (*)