Mayo 23, 2011 - Simmangbay ti sumagmamano nga staff ti Caritas Nueva Segovia ditoy parokya ni Nuestra Seńora de Lourdes Alilem, Ilocos Sur tapno isuroda ti maawagan Vermiculture ken Vermicomposting a panagaramid ti organiko nga abuno nga usaren dagiti mannalon. Ti nasao a wagas ket nangnayon iti ammo dagiti mannalon ti parokya nga agaramid iti nasalun-at a wagas panagtalon kalpasan ti immun-unan a naadalda a panagparupsa kadagiti ramen iti nasayaat nga abuno. Naadalda ti panagpaadu ti alinta nga isu ti mangan ken mangitakki ti maaramid nga abuno.
Adda inbati ti Caritas Nueva Segovia a shredding machine a mausar a pangtegteg kadagiti mausar a materyales. Naammoan iti Patangan Parokya XXVII idi Mayo 22, 2011 a maragsakan dagiti pumarokya gapu ti kaadda iti usaren a makina ket mangnamnamada nga adda koma pay sabali a nayonna.
Gapu iti daytoy, inkidkiddaw ni Fr. Arwin Romulo Rebollido iti Caritas nga mangipaayda pay ti sabali a shredding machine tapno nalaka nga agsaknap ti organic farming ditoy Alilem. Adda sumagmamanon a kakabsat kadagiti nadumaduma a barangay ti nangirugin nga agaramid iti vermiculture ken vermicomposting. Kinaagpaysona, isu met iti isursuro itan ti Department of Agriculture iti gobyerno lokal ti Alilem. Gapu iti daytoy, sidaddaan a makitinnulong ti Simbaan iti panagsaknapna.
Ti Caritas Nueva Segovia a sangaili ket indauloan ni Mr. Alex Valdez kadduana dagiti naggapu ti parokya ni San Isidro, San Juan, Ilocos Sur. (*)
No comments:
Post a Comment