Nagtitipon ti 197 a delegados manipud kadagiti siam a parokya a mangbukel ti Bikariato ni Santa Teresita ditoy Alilem idi Mayo 8-19, 2011 tapno makipasetda ti maikawalo a Taripnong Pastoral ti Santa Teresita (TAPASTE 8). Nakidar-ay met ditoy ti uppat a pumarokya ken kura paroko ti Nagbukel, Ilocos Sur a ni Fr. Mar Barroga tapno makiinnadalda maipapan iti programa pastoral iti bikariato. Ti nasao a bilang dagiti delegados ket linaon ti uneg iti maar-aramid a silpo ti simbaan-parokya kas lugar a nagadalan ken nagtataripnonganda. Dagiti pampamilya ditoy Brgy. Poblacion ti nangpadagus kadagiti naggapu kadagiti sabali nga parokya iti maysa a rabii.
Nagserbi ti nasao a panagtitipon kas Easter Recollection dagiti addaan akem kadagiti parparokya ditoy bikariato ni Santa Teresita. Nakipaset ditoy dagiti papadi, parish animators, katekista, mangiwanwan gimong ken dadduma pay nga addaan akem. Nakitipon met dagiti agarup 60 nga Ministro ti Komunion, Lectors ken Commentators ditoy Alilem kas paset iti sanay-akemda iti bulan ti Mayo.
Ti recollection ket naisentro iti panangutob iti langa ti agdama a Simbaan ken dagiti kamengna. Naammoan dagiti saan a nasayaat a buyana ket nagpanpanunutan dagiti delegados no kasano a balbaliwan ken pasayaaten pay. Ti panagungar ni Apo Hesus ti kangrunaan a nangted namnama ken inspirasyon tapno rumkuas iti dakes a sistema iti biag simbaan ken kagimongan.
Nainayon a nagpapatangan ti panangurnos ken panangsimpa manen kadagiti basic ecclesial communities (BEC) wenno Simbaan Sangakarrubaan (SISA) kas tulbek ti panagbalbaliw. Naiyam-ammo ti baro a wagas iti community building a kas iti agdama a maar-aramid ditoy paroktayo nga Alilem. Ni Fr. Arwin Romulo Rebollido ti napusgan nga naiwanwan ti adal ket ditoy a narikna ti tarigagay dagiti nakipaset a mangaramid met ti proseso. Dagiti papadi ti bikariato ket agtitipondanto intono Hunio 12-13, 2011 idiay Sugpon, Ilocos Sur tapno pagtitinonganda dagiti addang ti BEC building ket ditoyto a mairugi ti padapada a panagmisyon.
Ti sumaruno a TAPASTE ket maaramidto intono umay a bulan (Hulio) idiay Santa Cruz, Ilocos Sur tapno pagbibinnurayan dagiti maigannuat nga aktibidades babaen iti ranud-padas akem. (*)
No comments:
Post a Comment