Impatay ni Arzobispo Ernesto A. Salgado D.D. dagiti imana kadagiti tallo a seminarista ditoy Arkidiosesis ti Nueva Segovia pakairamanan ni Feliciano Bugtong, Jr. manipud ili ti Alilem ditoy parokya ni Nuestra Señora de Lourdes tapno maitan-okda iti saad a diakono. Daytoy ti sentro ti Sakramento ti Ordinasyon a nairugi pay manipud iti tradisyon dagiti immuna a Kristyano. Impatay dagiti apostoles dagiti imada kadagiti pinilida a katulongan iti misyon. Naaramid daytoy idi Hunio 21, 2011 idiay Immaculate Concepcion School of Theology (ICST), Vigan City, Ilocos Sur.
Gapu iti nasao a pasamak, ni Rev. Feliciano Bugtong, Jr. ti kaunaan a pumarokya ditoy Alilem ti naitan-ok iti nasao a pagsaadan. Ti Simbaan wenno Iglesia (Tattao ti Dios) ket buklen dagiti nabuniagan a maawagan laygo. Ngem gapu ti Ordinasyon, mapili ti maysa a laygo ket maingato para iti nagpaiduma nga akem. Agbalin a nangatngato ti estadona ngem dagiti saan a naordenan, isu’t gapuna a maawagan iti Reberendo.
Numan pay maitan-ok ti maordenan, impalagip ni Arzobispo Salgado kadagiti tallo a naordenan a diakono nga akemda ti agserbi a saan ket nga isuda ti paserbian.
Iti rito ti ordinasyon, nagkari dagiti tallo a diakono iti panagtuddioda kenni arzobispo ken dagiti agbalinto a sunona. Insapatada pay iti panagtalinaedda a selibado wenno agnanayon nga awan asawana. Ti dakkel a katulonganda ket isu ti maikatlo nga karida nga di agsarday a panagkararag.
Ti kangrunaan nga akem ti diakono ket isu ti panangiwaragawag ti Naimbag a Damag ti pannakaisalakan. Nabatad ti pinangbilin ni Apo Salgado kadagiti naordenan idi kinunana, “Awatem ti Ebangheliyo ni Kristo… Isurom ti basaem, patiem ti isurom, ibiagmo ti patiem.”
Nakipaset iti Misa ti Ordinasyon dagiti papadi ti Arkidiosesis ti Nueva Segovia ken papadi ti ICST, dagiti kameng ti pamilya dagiti naordenan, seminarista ken dadduma pay a bisita. Adu a taga Alilem ti dimmar-ay malaksid kadagiti kakabaggian ni Rev. Bong. Nairaman ditoy dagiti addaan akem ti parokya gaputa nagserbi daytoy a paset ti sanay-akem ken pilgrimage para kadakuada.
Babaen ti ranud-padas iti naangay a Patangan-Parokya XXVIII idi Hunio 26, 2011, impeksa dagiti nakipaset ti ordinasyon dagiti nadumaduma a narikna ken napadasanda. Nakitada ti kinasolemne ken kinarungbo ti selebrasyon. Nariknada ti nagpaiduma a ragsak ken pannakatukay gaputa kaadduan kadakuada ti damo a makaimatang iti kastoy a pasamak. Napnoanda ti gagar a makaimatangto ditoy simbaan parokya ti aldaw a pannakaorden ni Rev. Bong iti kinapadi.
Naammoan dagiti tallo a diakono ti arkidiosesis ti umuna a pagserbianda idi Hunio 27, 2011. Mapan ni Rev. Bugtong idiay Parokya ni San Agustin, Tagudin, Ilocos Sur. Agserbi met ni Rev. Rosmel Cairel idiay parokya ni Santa Maria, Santa Maria, Ilocos Sur. Makikaysa met kadagiti papadi idiay Archbishop’s Residence ni Rev. Angelito Degracia. Agsisinnublat dagiti tallo a diakono ti pagserbianda kada tallo a bulan agingga a sakbay a maordenanda a papadi. (*)
No comments:
Post a Comment