Tudo saan a lapped iti Parish Easter Youth Camp

 Naangay ti Parish Easter Youth Camp (PEYC) ditoy parokya ni Nuestra Seńora de Lourdes Alilem, Ilocos Sur idi Mayo 28-29, 2011 idiay Brgy. Apang. Nakipaset ditoy ti 60 nga agtutubo a naggapu kadagiti nadumaduma a barangay numan pay napigsa ti tudo.

   Dagiti delegados ket naragsak a pinasangbay ni Brgy. Captain Aquilino Baday iti pakauna a balikasna iti umuna nga aldaw. Nakipagsangaili met dagiti lumugar babaen iti naayat a panangisaganada kadagiti masapul.

   Ti nagbalin a turongen ti panagtitipon ket isu iti panangutob dagiti agtutubo ti akemda iti kagimongan. Nagun-od daytoy babaen iti   panangammo iti bukod a kabaelan kasta met  iti pannakaiyadayuda iti dakes nga ibunga ti agdama a teknolohiya.

Maysa a grupo dagiti agtutubo kabayatan ti adal ken ranud-padas

   Tapno adda kaipapanan dagiti inadalda, nangipaayda iti nasao a barangay ti community services a kas iti panagmula iti kayo kadagiti kabanbantayan. Timmulongda pay a nagdalus iti aglawlaw.

   Kas paset iti panangimulagatda ti matada kadagiti pudno a pasamak, imparangda babaen iti Lang-ay Agtutubo, dagiti makitada a dakes a kannawidan ti bukodda a gimong tapno masarakanda ti umisu nga addang tapno adda panagbalbaliw.

   Naigibus ti PEYC babaen iti rambak-Misa nga indauloan ti kura paroko a ni Fr. Arwin Romulo Y. Rebollido. Ditoy a nakipaset met dagiti kameng ti gimong Apang. Kas karit ti padi kadagiti agtutubo, inbinsa-binsana a saan nga umanay ti panagadal ken panagkararag laeng tapno adda panagbalbaliw. Masapul nga adda igannuat nga aramiden. (*)