BULAN TI ROSARIO: Addang ti Panagkaykaysa, Pannakipaset iti Gimong

Dagiti Agasawa a Mangibagi kadagiti gimong kabayatan ti Panag-Rosarioda iti maysa a dekada kas panglukat ti Patangan Parokya 32 idi Setyembre 25, 2011 iti uneg ti extension ti simbaan-parokya.

“Maria, ina ni Hesus, ina ti Simbaan, ina ti gimongmi, ken ina dagiti pamilyami.”

   Daytoy ti tema iti Bulan ti Santo Rosario ita a tawen ditoy parokya ni Nuestra Seńora de Lourdes, Alilem, Ilocos Sur. Panggepna daytoy a tignayen dagiti pumarokya tapno ad-adda pay a makikaysada kadagiti kameng iti bukodda a Basic Ecclesial Community (BEC) wenno gimong tapno kas ken Maria, sangsangkamaysada a makipaset iti misyon ni Hesus nga isu met laeng a misyon ti Simbaan.

   Dagiti mangibagi kadagiti gimong a nakipaset iti Patangan Parokya XXXII idi Setyembre 25, 2011 ket naglualoda iti maysa a dekada ti Santo Rosario kas kararag a panglukat ti taripnongda. Daytoy met ti  nagserbi a sanay dagiti nakipaset tapno ammoda ti urnos ti panag-Santo Rosario iti bukodda a gimong a nairugi idi Oktubre 1, 2011.

   Adda dagiti naibunong a pagsurotan iti tunggal gimong ket naipakaammo kadagiti nakipaset iti nasao a taripnong nga maipangpangruna ti sangkagimongan a panag-Santo Rosario. Segun iti pagannurutan, maurnos ti panagsisinnublat dagiti pagtaengan iti tunggal gimong iti kada aldaw nga isu ti pagtitiponan dagiti kameng ti gimong nga ag-Rosario. Dagiti met kameng ti pamilya ti mangidaulo iti kararag.

   Tapno marikna met ti konkreto a pannakipaset dagiti amin a pamilya kadagiti gannuat ken proyekto ti parokya, maawisda amin a mangiruknoy ti aniaman a gatad kas daton a pagyamanda. Dagiti maurnong a  sagut ket matipon-tiponto amin a maidaton intono Oktubre 30, 2011 kabayatan iti Misa kas panggibus iti Bulan ti Rosario. Ngem, sakbayto dayta, maaramidto ti sangkaparokyaan a panag-Rosario.

   Maiyalis ti gagangay nga aldaw ti Patangan Parokya iti bulan ti Oktubre. Maaramidto daytoy intono 

Oktubre 23, 2011. Daytoyto ngamin ti yaay ni Arzobispo Ernesto A. Salgado, D.D. para iti Bisita Pastoralna. Isunto ti mangidaulo ti Misa ken ammoennanto ti kasasaad ti parokyatayo babaen iti maaramid a taripnong. Mangisuronto kadagiti pumarokya nga agserserbi ti Simbaan ken pirmaannanto dagiti Libro ti parokya.

   Maidawat a makipaset dagiti amin nga agasawa a mangibagi ti gimong, parish animators, Ministro ti Komunion, Lectors, Commentators ken mangibagi kadagiti agtutubo iti pannakiuman ken arzobispo iti Bisita Pastoral. Maiyawis pay kadagiti amin a pumarokya nga makidar-aytayo amin iti Misa ni arzobispo iti 8:30 ti bigat. Naisingasing a maaramidto ti Rukbab-Gimong kadagiti barbarangay iti malem ti Oktubre 23 tapno makaumay ti kaadduan ditoy Poblacion. (*)