Agosto 29-30, 2011 - Kalkalpas ti Bagyo Mina a nangdalapus ti amianan a Luzon, naangay ti Parish Youth Exchange 9 (YE 9) ditoy parokya ni Nuestra Seńora de Lourdes, Alilem, Ilocos Sur. Naaramid daytoy idiay gimong Dalawa Proper.
Ti immuna a naituding nga aldaw ti YE 9 ket idi koma Agosto 27-28, 2011, ngem gapu ti saan a nasayaat a paniempo, naiyalis ti aldawna.
Iti dagup dagiti 80 a nakipaset, adda met walo nga agtutubo a naggapu idiay parokya ni San Jose a Mangmangged, Nagbukel, Ilocos Sur.
“Biag: Sagut ti Dios Saluadan ken Ilalaen.”
Daytoy ti tema iti nasao a panagtitipon. Daytoy met laeng ti tema iti naangay a Vicarial Youth Exchange idi napan a bulan idiay Tagudin, Ilocos Sur. Ditoy a naggiinnadal dagiti agtutubo maipapan iti RH Bill a no sadino ket inpeksada met ti gagarda a mangtubngar iti panagbalinna a linteg.
Nakipaset met ditoy ti kura paroko ti Nagbukel a ni Fr. Mar Barroga. Nangted met ti pagpanunutan kadagiti agtutubo ket inbinsa-binsana ti pagtaktakderan ti Simbaan maipapan ti RH Bill. Kunana a ti RH Bill ket kontra ti pagayatan ti Dios gaputa pagbalinenna dagiti agasawa nga kasla Dios. Ti nakemdan ti surotenda a saan ket nga ti nakem ni Apo Dios no agusarda ti contraceptives. Kadagiti agtutubo, innayon pay ni Fr. Mar, a masapul a salluadanda met ti kinsagrado iti sex.
Nakipaset met ni Julie Anne Lazaga, maysa a youth leader ti Tagudin tapno agiburay ti sumagmamano nga adal maipanggep iti theater and arts. Daytoy ngamin ti napintas nga aramaten dagiti agtutubo tapno maiyebkasda ti sasaadenda.
Adda impaay dagiti agtutubo a community service iti Dalawa Proper kas pagyamanda. Naigibus met ti programa babaen ti rambak-Misa nga indauloanda ni Fr. Arwin Romulo Rebollido, ti kura paroko ti Alilem ken ni Fr. Barroga. (*)
 |
| Agidaton dagiti ag-primera komunion kadagiti seedlings. |
Primera Komunion nagsasagannad
Iti panagtultuloy ti Misa-pagadalan iti parokya ni Nuestra Seńora de Lourdes, Alilem, Ilocos Sur, tallo pay nga eskwela ti nakaipaayan ti primera komunion: Apang Elementary School (Agosto 12, 2011), Amilongan Elementary School (Agosto 19, 2011) ken Anaao Elementary School (Agosto 31, 2011).
Kas gagangay a pagannurutan ti parokya, napateg ti pannakipaset dagiti nagannak manipud panagsagana, kabayatan ken kalpasan ti primera komunion. Igunam-gunam ngamin ni Fr. Arwin Romulo Rebollido, kura paroko, a dagiti nagannak ti kangrunaan a maseknan iti primera komunion dagiti annak nga iti kinaganus dagiti panunotda, agsursuroda pay laeng ket masapul ti panangbayabay dagiti dadakkelda.
Iti Patangan Parokya XXXI idi Agosto 28, 2011, inburay dagiti mangibagi kadagiti gimong a nakaangayan ti primera komunion iti bulan ti Agosto nga adda dagiti ubbing a saan a natuloy ti panangawatda ken Hesus iti umuna a gundaway. Ti kangrunaan a makaigapu ket isu iti saan a pannakipaset ti maysa kadagiti nagannak kadakuada nangruna iti panag-recollection, panagkonfesar ken panangabay ti anakda iti aldaw ti primera komunion.
Maipakaammo nga iti bulan ti Setyembre 2011, awan ti maangay a primera komunion gapu ti saan pay a nasayaat a paniempo. Dagiti ngamin nabatbati a pagadalan ket kadagiti adayo nga barangay. Maituloyto iti bulan ti Oktubre tapno nasayaatton ti tiempo ken nawaywaya dagiti pumarokya. (*)
Bayanihan, 2nd collections: Proyekto parokya main-inut
Naipakaammo iti Patangan Parokya XXXI idi Agosto 28, 2011 nga awanen ti pondo a nakalasin nga agpaay iti proyekto a mangsimpa ken mangpalawa ti simbaan-parokya ti Nuestra Seńora de Lourdes, Alilem, Ilocos Sur.
Ti laeng pangnamnamaan tapno maitultuloy ti proyekto ket isu ti Dinominggo a second collections ditoy simbaan parokya ken dagiti kapilya ti gimong. Tapno bassit iti magastos, masansan met a maaramid ti ragup a panagtrabaho wenno bayanihan dagiti pumarokya a kas iti panangsemento ti church sanctuary idi Agosto 6 ken Agosto 20 iti daytoy a tawen. Dagiti addaan akem ti parokya iti kangrunaan a nakipaspaset iti bayanihan nangruna dagiti Ministro ti Komunion, Lectors, Commentators ken agtutubo. Babaen kadagitoy, in-inut ti pannakaleppas ti proyekto.
Dakkel pay a gatad ti kasapulan tapno makompleto ti simbaan a namnamaentayo a pakaangayan ti kaunaan nga Ordinasyon ditoy parokya. Daytoyto ti Ordinasyon iti kinapadi ni Rev. Feliciano Bugtong, Jr.
Naipalagip pay iti Patangan Parokya XXXI nga isubmitir koman iti opisina ti konbento dagiti aniaman a tulong nga inpaay dagiti nasaysayaat panagbiagna a kakabsat a nakaiyawatan dagiti solicitation letters tapno maresiboan dagitoy ket maikkanda iti surat a pagyaman. Ditoy met a mairugi ti panangaramid iti master list dagiti donors tapno maiparangto ken Arzobispo Ernesto Salgado no umay iti Pastoral Visit iti saanen a mabayag a panawen.
Kabayatanna, agtultuloy ti panagunnoy ti parokya iti tulong pinansial kadatayo amin a pumarokya ken kadagiti am-ammotayo. Kanayon a maipalagip nga simbaantayo daytoy ket kukuatayo. Napintas ngarud a makikaysatayo amin kadagiti gannuat ken proyektona. (*)
No comments:
Post a Comment