KATEKISMO

ANIA TI SAKRAMENTO TI KONFIRMA?

Ti Sakramento ti Konfirma ti kalatakan a senyal ti grasya tapno umapay ti Espiritu Santo. Maawagan daytoy a   Konfirma gaputa pasingkedan (confirm) ken papigsaenna ti grasya iti Buniag. Babaen ti Espiritu Santo, agbalintayo a napekpeklan a Kristyano ken saksi ni Kristo iti sao ken aramid agingga a mataytayo.

KAANO NGA INPASDEK NI HESUS TI SAKRAMENTO TI KONFIRMA?

Inpasdek ni Hesus ti Sakramento ti Konfirma idi kinunana iti Juan 20:21-22: “Kas iti panangibaon kaniak ti Ama, kasta met ti   panangibaonko kadakayo.” Sinang-awanna ida ket kinunana, “Awatenyo ti Espiritu Santo...” Ti kaunaan a Konfirma ti Espiritu Santo ket  napasamak iti aldaw ti              Pentecostes (33 AD), idi nga immulog ti Espiritu Santo kenni Maria ken dagiti Apostoles  nga nagguummong idiay Jerusalem (Aramid 2).

SIASINO TI MINISTRO TI KONFIRMA?

Ti Ministro ti Konfirma ket ti Obispo. Masapul nga Obispo ti mangomfirma tapno magun-od ti panagkaykaysa,      kinakatoliko ken pannakaikaysa kadagiti Apostoles iti    Simbaan. Amin ngamin nga Obispo ket mismoa suno dagiti apostoles babaen iti makunkuna nga apostolic  succession.

MABALIN KADI A MANGOMFIRMA TI PADI?

Para kadagiti naisangsangayan a gundaway, ti Obispo ket mabalinna nga ipaima iti padi ti akem a mangomfirma. Masansan ket madutokan ti kura paroko iti daytoy nga akem. Mabalinna a konfirmaan dagiti agkasar a saan pay a nakonfirmaan ket ti kaadda ti obispo iti parokya ket saan a masansan. No agngangabit ken patay, uray siasino a padi ket mabalinna ti mangomfirma. Ti Lana ti Krisma a mausar ket kinonsagraran ti obispo.

ANIA DAGITI MAKITA A PAGILASINAN  ITI  KONFIRMA?

Dagiti napateg a pagilasinan iti Sakramento ti Konfirma ket ti pannakaipatay dagiti ima ken ti Nasantoan Lana ti Krisma.

ANIA TI KAIPAPANAN TI PANNAKAIPATAY DAGITI IMA?

Ti pannakaipatay dagiti ima ket ipasimudaagna ti yaay iti Espiritu Santo. Mayannatup daytoy iti pagpatulad dagiti Apostoles a kas ti naiparang iti Aramid 8:17: “Impatay da Pedro ken Juan dagiti imada kadakuada ket inawatda ti Espiritu Santo.”

ANIA TI NASANTOAN A LANA TI KRISMA?

Ti Lana ti Krisma ket lana ti olivo a nalaokan iti        bangbanglo. Konsagraran ti obispo daytoy a lana kabayatan iti Misa ti Nasantoan a Krisma iti Huebes Santo idiay Cathedral. Ti bangbanglo ket ipasimudaagna ti nasam-it nga angot ni Kristo a masapul met nga idanun  dagiti amin a Kristyano iti sangalubongan.

Iti Daan a Tulag, agbalin a profeta, ari wenno padi ti maysa a tao no malanaan. Kas ken Isaias a profeta (Isaias 61:1), ni Saul nga ari (1 Samuel 10:1), ken ni Aaron a padi (Leviticus 8:12), nalanaanda (anointed).

No malanaantayo iti Lana ti Krisma, makikaysatayo met iti misyon a kina-padi, kina-ari ken kina-profeta ni Kristo.Ti pannakalana (anointing) ket pataudenna ti nagan a Kristo ken Kristyano (Christ = anointed).

ANIA TI AKEM A KINA-PROFETA, KINA-PADI KEN KINA-ARI?

Ti kina-profeta ket akem ti tunggal Kristyano a  mangiwaragawag ti Naimbag a Damag babaen iti sao ken aramid.

Ti kina-ari ipasimudaagna iti pannakikaysatayo iti Pagarian ti Dios ken ti panangparmektayo ti panagari ti basol ken patay.

Ti kina-padi ket mangipalagip ti masansan a panagkararag iti Dios ken panangidatontayo ti biagtayo a makikaysa ken Kristo. Ti kinapadi (common priesthood) dagiti amin a Kristyano ket saan a kapada ti kinapadi dagiti naordenan.

ANIA TI MAKUNKUNA A “FORM” ITI KONFIRMA?

Ti makunkuna a “form” iti konfirmasyon ket isu ti kararag nga isawang ti obispo no mangomfirma. Kalpasan nga ipatayna dagiti imana, isawangna dagiti sumaganad no ugesanna ti moging babaen ti Lana ti Krisma: “MAIMALDIT KOMA KENKA TI SAGUT TI ESPIRITU SANTO.”

ANIA TI IPASIMUDAAG TI PANNAKATUNGPA ITI PINGPING?

Kas tradisyon, kalpasan ti pannakaipatay dagiti ima ken ti pannakalana, tungpaen ti obispo ti pingping iti makonfirmaan. Iladawanna daytoy ti kinatured. Ti makonfirmaan ngamin ket agbalin a soldado ni Kristo (miles Christi). Masapul a makigubat a situtured nga agpaay iti Pagarian ti Dios.

ANIA DAGITI BUNGA TI KONFIRMA?

Tallo ti ibunga iti Konfirma:

  1. Ipaayna ti Espiritu Santo

  2. Pagbalinennatayo a nanakem a Kristyano

  3. Mangted ti galad

ANIA TI GALAD NGA IPAAY TI KONFIRMA?

Ti galad nga ipaay ti Konfirma ket isu ti naespirituan a marka a mangkonsagrar kadatayo ken Kristo. Kinuna ni San Pablo a ti Dios “...ti nangikabil iti marka a kukuanakami ken isu ti nangted iti Espiritu Santo iti pusomi a kas talged ti amin nga ipaayna kadakami.” Daytoy a galad ket saan a mapunas a marka. Kayatna a sawen a kadduanatayo ni Kristo. Kayariganna daytoy ti marka kadagiti soldado nga agtalinaedda a napudno iti liderda wenno ti selyo iti maysa a dokumento tapno makuna nga us-usto.

Ti Buniag ken Ordiansyon ket mangtedda met ti di mapunas a galad. Ngarud, dagitoy tallo a sakramento ket saan a mabalin a maulit ken dinto pulos maikkat.

SIASINO TI MABALIN A MAKONFIRMAAN?

Amin a nabuniagan ket masapul a makonfirmaan no madanunna ti tawenna a kabaelannan ti agrason wenno nasimbengen ti panunotna. Ditoy Pilipinas, mabalin a    makonfirmaan dagiti agtawen iti 12 agpangato.

KASANO TI SASAADEN DAGITI NATAENGAN A KANDIDATO TI KONFIRMA?

Mabalin nga mammaminsan a mabuniagan, makonfirmaan ken agkomunion ti nataengan apaman a naisaganan a nalaing. Ti nabuniaganen a nataengan ket mabalin a makonfirmaan iti aniaman a kanito kalpasan a maisagana.

KASAPULAN KADI A MAISAGANA TI              MAKONFIRMAAN?

Masapul a maisagana ti makonfirmaan nangruna iti pannakairuamna kadagiti uppat nga adigi ti Katoliko a pammati. Isu dagiti sumaganad: Kredo, Sakramento,  Dagiti Bilbilin ken Kararag. Mairaman ditoy ti pannakaawat iti kaipapanan ti Espiritu Santo (ti pannakaiparangarangna ken dagiti sagutna) kasta met ti nanakem a pannakipasetna iti biag ken misyon ti  Simbaan.

NASKEN KADI NGA AGKONFESAR NGA UMUNA SAKBAY A MAKONFIRMAAN?

Wen, masapul. Tapno marambakan ti Sakramento ti Konfirma, masapul nga nadalus wenno addatayo iti estado ti grasya. Kasapulan nga ibabawitayo nga umuna dagiti basoltayo.

KASAPULAN KADI TI MANGANAK ITI KONFIRMA?

Wen, masapul. Tunggal maysa a makonfirmaan ket masapul a kuyogen ti maysa a manganak (sponsor). No mabalin ket ti nanganak met laeng ti Buniag iti manganak ti Konfirma.

ANIA TI AKEM TI MANGANAK ITI KONFIRMA?

Dua ti akem ti manganak iti konfirma:

  1. Isu ti mangidatag ti anakenna iti Obispo tapno     makonfirmaan.

  2. Bayabayenna ti anakenna tapno agbalin a

    nasayaat a Kristyano.

SIASINO TI MABALIN A MANGANAK TI      KONFIRMA?

Tallo ti kasapulan:

  1.     Saan a nababbaba ngem 16 ti tawenna

  2. Masapul a Katoliko ken ibibiagna ti                   Kinakatolikona (nasayaat ti kababalinna ken nakonfirmaan metten)

  3.   Saan nga isu ti ina wenno ama ti                       makonfirmaan. (*)

GIBUSNA