DAGITI NAPASAMAK

VYE 10 pinasangbay ti Cervantes

Dagiti agtutubo kabayatan ti sala-pammaregta

Setyembre 10-11, 2011 - Naragsak a pinasangbay ni Fr. Ernesto Juarez, Jr., kura paroko ti parokya ni Santo Nińo de Praga, Cervantes, Ilocos Sur, dagiti 167 nga agtutubo ti Bikariato ni Santa Teresita para iti maika-10 a Vicarial Youth Exchange (VYE). Adda met naggapu idiay parokya ni San Jose Mangmangged, Nagbukel, Ilocos Sur

   Ti bulan iti Setyembre ket bulan a panangilagip iti patron dagiti agtutubo a ni San Lorenzo Ruiz. Daytoy ti gapuna a nagbalin a sentro ti adal ken patangan dagiti agtutubo ket isu iti panangammo ken panangadalda iti kabibiag ti nasao a Santo.

   Kas maysa nga agtutubo, ni San Lorenzo ket naammoan dagiti nakipaset iti VYE a maysa daytoy a Santo a nangipateg iti pammatina ket tinakderanna daytoy agingga ken patay. Sidadaan a nagsagaba tapno takderanna ti kinapudno. Nagbalin ni Lorenzo a martir. Daytoy met ti napintas a tuladen dagiti   agtutubo ita.

   Agramaram dagiti aktibidades ket nabalanse dagitoy tapno mamuli dagiti agtutubo kadagiti amin a  benneg ti panagbiag. Addapanagkararag, adal kagimongan ken politika, panaglalangen, pannakipagbiag kadagiti pampamilya, ken panagay-ayam.

   Sangapulo nga agtutubo ti naggapu ditoy ilitayo nga Alilem.  Mapadpadaanan a dagitoy a delegados ti mangurnos ti maangay a Parish Youth Exchange a naituding a maaramid intono Oktubre 21-23, 2011. Kadduadanto dagiti seminarista ti Nueva Segovia a manggamulo daytoy gaputa mairananto nga umayda aramiden ti Vocation Campaign. (*)

Krus ti simbaan naipwesto

Ti laem ti simbaan-parokya ni Nuestra Senyora de Lourdes. Saan pay a naileppas ngem maus-usaren para iti Misa ken Rukbab-Gimong.

 

Setyembre 14, 2011 - Fiesta ti Pannaitan-ok ti Nasantoan a Krus ti aldaw a pannakaipwesto ti kabarbaro a life size crucifix iti laem ti simbaan ditoy parokya ni Nuestra Seńora de Lourdes, Alilem, Ilocos Sur.

   Nakalalagip ti nasao nga aldaw gaputa nairana a naisangpet ti kabarbaro nga imahen iti dayta nga aldaw a no sadino ket rambakan ti Simbaan ti panangipateg iti krus ni Apo Hesus a kas senyal ken mangipalagip ti pannakaisalakantayo.

   Ti nasao nga imah en ket napaadda babaen iti tulong ti sumagmamano a kakabsat a saan a taga Alilem ngem naayatda a   tumultulong iti Simbaan.

   Iti agdama, maus-usaren ti napalawa a laem ti simbaan numan pay saan pay a nalpas. Naisardeng manen ti panagtrabaho gaputa naibus manen ti adda a pondo nga aggapu kadagiti Sagut Pamilya (tithing), second             collections ken donasyon dagiti pumarokya.

   Daytoyto ti langa ti simbaantayo a madanunan ni Arzobispo Ernesto A. Salgado intono umay iti Bisita Pastoralna a naipakaammo a maaramid intono Oktubre 23, 2011, aldaw ti Domingo.

   Kabayatanna, manarimaan ti panangpapaadda dagiti gim-gimong kadagiti kayo a mausar iti pannakaaramid dagiti pews wenno tugaw iti extension ti simbaan. Adda naited a rukod dagiti matistis a kayo ket addan sumagmamano a gimong ti       nangyeg kadagitoy a kayo.

   Naipalagip manen iti Patangan Parokya XXXII idi Setyembre 25, 2011 ti agtultuloy a panagtitinnulongtayo a pumarokya iti panangpaadda iti pondo tapno maileppas ti proyekto - ti pannakapalawa ken pannakasimpa ti madaddadael a simbaan-parokyatayo. (*)