DAGITI NAPASAMAK II

Anaao Elementary School

Pannakayanak ni Maria naipateg kadagiti    pagadalan

Pannakailagip ti pannakayanak ni Apo Santa Maria, ina ni Hesus, ti urnos ti liturhiya kadagiti Misa pagadalan iti bulan ti Setyembre 2011. Maysa daytoy nga addang tapno maipaganetget kadagiti ubbing ken agtutubo ti panangipategda iti debosyon ken Apo Santa Maria. Setyembre 8 ti kasangay iti Birhen.

   Tapno maamiris dagiti agbasbasa iti pateg ni Apo Santa Maria, masansan nga ipalagip ni Fr. Arwin Romulo Rebollido, kura paroko ti Alilem, ti akem dagiti inna wenno bukod a nanangtayo. Kunana a dagiti inna ket ti laeng pagsayaatan dagiti annakda ti nasisita. Asidegda kadatayo nga annakda.

   Kastoy met ni Maria kadatayo gaputa isu ket inatayo met. Mariribukan no adda dumteng a parikottayo ket  sidadaan a tumulong kas mangibabaet kadatayo ken Hesus nga anakna.

   Iti sabali a bangir, ipalagip pay ni Fr. Arwin, a narigat no awan a pulos wenno kurang ti panagdayawtayo kenni nanangtayo. Saan a nasayaat a pasaktantayo ida. Kasta met ken Maria. Narigat a panunuten no awan met a pulos ti panagraemtayo kenkuana.

   Ti bulan iti Oktubre ket bulan ti Santo Rosario. Maituloyto met kadagiti pagadalan iti panagkamang ken Maria. Napintas a masursuro pay   dagiti ubbing ti ag-Santo Rosario. (*)

 

  

Libre a panagadal mairubrubbuat

Ni Mr. Alex Valdez manipud Caritas Nueva Segovia kabayatan ti panagsarungkar ditoy Alilem idi Agosto 2011.

 

Setyembre 20, 2011 - Nakiuman ni Fr. Arwin Romulo Rebollido, kura paroko ti Nuestra Seńora de Lourdes, Alilem, Ilocos Sur, iti opisina ti Caritas Nueva Segovia tapno ammoenna ti pagdurdur-asan ti main-inaw a proyekto nga ipaay ti Pondo ng Pinoy ditoy ilitayo. Ditoy a  naammoan babaen ken Sr. Lilian Carranza, OSB ken mangimatmaton iti nasao nga opisina nga mairugin daytoy iti kabiitan a panawen. Maaramidto daytoy intono Oktubre 17-29, 2011.

   Iti Patangan Parokya XXXII idi Setyembre 25, 2011, napatutulagan a pumili dagiti mangibagi kadagiti gimong iti lima a kakabsat iti tunggal barangay ket dagiti pudno nga agkasapulan ti maipangruna. 30 agingga iti 45 ti bilang dagiti agbasa ket masapul a nakaturposdan iti sekondarya.   Dagitoy ti umuna nga agbasa iti nasao a kurso nga ipaay ti Technical Education and Skills  Development Authority (TESDA). Dagiti dadduma pay a kurso ket sumarsarunonto a maipaay.

   Ti umuna a kurso ket pangpadasan pay laeng ti parokya ket matingitingto daytoy kadagiti sumaruno a Patangan Parokya.

   Kabayatanna, maipalagip ti agtultuloy a pannakipasettayo iti Pondo ng Pinoy - ti panangurnong kadagiti maregmegtayo a sagbibinting wenno nangatngato pay a gatad ti kuarta ket ikabiltayo iti bote wenno lata nga addaan kananakem a tumulong kadagiti napanglaw. Daytoy ngamin ti mangipaay iti tulong ti parokyatayo nga libre a vocational courses. Maisingasing nga idatontayo dagitoy a maregmegtayo no marambakan ti Nasantoan a Misa kadagiti gimongtayo. (*)